Бу хайалара итинник уонна тоҕо ыйыыр эбитий?
СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Ойуур үлэһиттэрин күнүгэр анаммыт икки күннээх тэрээһиннэрин чэрчитинэн Саха Өрөспүүбүлүкэтин култууратын үтүөлээх үлэһитэ, Саха Өрөспүүбүлүкэтин Судаарыстыбаннай бириэмийэтин лауреата Николай Крылов буойуннар үтүө ааттарын ыччакка иҥэрээри суруйбут, Сэбиэскэй Сойуус Геройа Николай Саввич Степанов төрөөбүтэ 100 сылыгар анаммыт иккистээн тахсыбыт “Төлөнүллүбүт иэс” (ахтыылар, суруктар, ыстатыйалар, докумуоннар) кинигэтин биһирэмэ “Арассыыйа – мин устуоруйам” устуоруйа пааркатыгар буола турарын туһунан “Эдэр саас” саайтка иһитиннэрдилэр.
“Көлүөнэни көлүөнэ солбуйар. Биһиги Геройдарбыт олохторун түмүгэ кэлэр ыччакка кэриэс буолан сөҥөн иһиэхтээх. Геройдарбыт – биһиги киэн туттунуубут, атын омуктары кытта тэҥнээхпитин кэрэһилээччилэрбит. Кинилэр кэриэстэрэ, омук ийэ тылын кытта дьон уоһуттан түспэтин тухары, тыыннаах буолуоҕа”, — диэн ааптар киирии тылыгар суруйбутун курдук, “Төлөнүллүбүт иэс” кэлэр көлүөнэҕэ кэриэс буолан хааларын туһугар маннык кинигэ сүрэхтэниитэ тэриллэрэ чахчы.
Ойуур үлэһитин күнүн кытта Николай Саввич Степанов олоҕо туох ситимнээҕий? Ааптар, аатырбыт суруналыыс Николай Александрович Крылов бу кинигэтигэр Николай Саввич айылҕаны таптыырын туһунан кэпсээни киэргэтэн эрэ этиллибэтэх. “Бу тухары, Бүлүүтээҕи лесхозка 33 сыл арахсыбакка үлэлээбит кэмигэр, ама, айылҕаны араҥаччылаабата, баай хара тыатын харыстаабата диэхпит дуо…”, — диэбитин курдук, Собиэскэй Сойуус Геройун айылҕаны харыстааһыҥҥа үлэтин сыаналаан, бу СӨ Экологияҕа министиэристибэтин анал тэрээһинин иһигэр киирэн, кинигэ сүрэхтэниитэ ыытылыннаҕа. Кинигэ тахсыытыгар «Саха Өрөспүүбүлүкэтин лесоводтарын уопсастыбата» уонна ити уопсастыбаннай тэрилтэ бэрэссэдээтэлэ Саргылаана Аммосова үбүлээһиҥҥэ көмөлөспүттэр.
Саввич хаартыскаҕа түһэриинэн бэркэ дьарыктаммыт. Ол барыта ойуур үлэтин кытта ситимнээҕэ. Хомуллубатах, дьаһаллыбатах дэлээнэлэри уонна оннук хаалларбыт дьону хаартыскаҕа түһэрэн, кулуупка истиэндэ оҥорон ыйаан кэбиһэр эбит. Инньэ гынан маһы кэрдиини улаханнык бэрээдэктээбит. Дьэ, маны киэҥ ис хоһоонноох кинигэ биһирэмигэр сылдьыбыт ойуур үлэһиттэрэ болҕомтоҕо ылан, үлэлэригэр туһаналларыгар эрэнэбит.
Бэлэмнээтэ Женни Стрюкова