Сунтаарга Хомус күннэрэ саҕаланнылар. «Олоҥхо дойдутун оһуордаах оонньуута» хомус күрэҕэр култуура салалтата уран уустарын өйөөн, Күүкэйтэн Дмитрий Николаев, Сунтаартан Егор Тартаков хомустарын бириис туруорда.
edersaas.ru
Бүгүн оҕолорго тэриллэр хомус күрэҕэр кылаан кыайыылаахха хомус ууһа Дмитрий Николаев бэйэтин хомуһун бэлэх уунар. Бу курдук хомуспут уустара сыл аайы маннык бэлэҕи оҥороллоро олус күндү!
Оттон Аҕа баһылыкпыт Анатолий Григорьев Румынияҕа тустуук уолбутун Николай Охлопковы чөмпүйэнээккэ өйүүр сырыытыгар, ол дойду баһылыгар, бас-көс дьонугар Бордоҥтон Кирилл Петров хомустарын бэлэх оҥордо. Онон биһиги уолаттарбыт хомуһуннаах хомустара араас дойдунан тэлэһийэ саха төрүт муусукатын дьүрүһүтэллэр.
Биһиги баһылыктарбыт хомуһу күргүөмүнэн өйүүллэр, Хомус түмэлиттэн норуоттар икки ардыларынааҕы хомуһу толорооччулар диэн туоһу суруктаахтар.
Онон да, баһылыктарбыт, кинилэр солбуйааччылара култуура тэрээһиннэригэр куруутун көхтөөх кыттыыны ылаллар. Холобур, олоҥхо күрэҕэр Бордоҥ нэһилиэгин баһылыга Гаврил Черепанов кылыһахтаах тойугунан олоҥхо бэстибээлигэр кытынна, дьонун-сэргэтин олоҥхоҕо көҕүлээн бөлөҕүнэн толорууга 30-тан тахса киһини кытыннарда. Сиэйэ нэһилиэгин баһылыга Алексей Обоюков бэҕэһээ биир дойдулаахтарын кытта хомустаан кэрэ түгэни бэлэх оҥордо. Дьэ, бу курдук баһылыктар маннык кэрэ эйгэҕэ сылдьан салайар сатабыллара кытта сайдыылаах буолар. Маладьыастар! Салгыы өссө биир умнуллубат түгэнинэн, аҕыйах хонугунан Сунтаар хомуһа улуу Мексика сиригэр саха култууратын бэстибээлигэр дьүрүһүйүө!
Мария Кобельянова-Тускулаана, edersaas.ru саайтка анаан.