Бырааһынньыктары дьон араастаан бэлиэтиир: ким ас астаан, ким эрэстэрээннээн, ким похуоттаан. edersaas.ru
Дьааҥы улууһун Арыылааҕын «Доруобуйа ыллыга» скандинавскай хаамыы кулууба бары бырааһынньыктары ыраас салгынынан тыынан, «скандинан» хааман бэлиэтиир. Нэһилиэк дьахталлара хаамыынан дьарыктаммыттара бэһис үбүлүөйдээх сыллара.
Анал бэйэлэрэ тиктибит пуормалаахтар. Онон нэһилиэккэ «скандинавтар» биир тарбахха баттанар бастыҥ уопсастыбаннай тэрилтэнэн буолаллар.
Бүгүн «ыллыктар» 14 киһи буолан, Исээх хайаҕа тахсан, Хомсомуол күнүн бэлиэтээтилэр.
Скандинавскай хаамыынан нэһилиэккэ аан бастаан билигин 89 саастаах Василий Сивцев дьарыктанан саҕалаабыт. Василий Иннокентьевич сэбиэт бэрэссэдээтэлинэн үлэлээбит киһи буолан, олоҕу көрүүтэ да, толкуйа да инникилээн истэҕэ. Ытык кырдьаҕас 2004 сылтан хаамыынан дьарыктанар. Быйыл «скандилаабыта» 13-с сыла. Кини холобурунан Арыылаах орто оскуолатын үөрэнээччитэ Коля Слепцов хаамыы доруобуйаҕа туһатын уонна уһун үйэлэнии туһунан 2010-2014 сылларга «Инникигэ хардыы» научнай-практическай кэмпириэнсийэҕэ ситиһиилээхтик кыттыбыт. 90 сааһын эһиил туолар Василий Иннокентьевич билигин да күҥҥэ ортотунан 3 км хаамар үһү.
Арыылаах дьахталлара кинилэри хаамыыга уһуйбут киһилэрин туһунан олус махтанан кэпсииллэр. Ол курдук, биэс сыллааҕыта Адыаччыттан төрүттээх эдэркээн быраас Валерия Потапова кэлэн доруобуйаны бөҕөргөтөр анал бөлөҕү тэрийбит. Валерия Викторовна хааннарын намтааһынын бэрэбиэркэлээн баран, ыарыһахтарын хаамыынан дьарыктаабыт.
Бастаан утаа спортсаалаҕа дьарыктаммыттар. Онтон сыыйа таһырдьа тахсан, билигин Исээх хайаҕа тиийэ хаамар буолбуттар.
— Биһиги бары үлэлээх дьон буолан, күн аайы хаамар кыахпыт суох. Ол иһин өрөбүллэри куоттарбакка, нэдиэлэҕэ биирдэ хайаан да ыраата барабыт.
Тиийэн сэрээккэлиибит, ким төһөнү кыайарынан салгыы хаамар, туһунан дьарыктанар. Бөлөхпүтүгэр отучча дьахтар дьарыктанар. Бүгүн Хомсомуол күнүнэн Исээх хайаҕа тиийэ хааман бэлиэтээтибит.
Аны сэтинньи 5 күнүгэр Улуу Өктөөп үбүлүөйдээх 100 сылын көхтөөхтүк тахсан бэлиэтиэхпит. Онно түөспүтүгэр кыһыл гвоздикалары иилиниэхпит, былаахтаах тахсыахпыт. Быһата, Өктөөп символын барытын туһаныахпыт. Сыл аайы ахсынньы аам-даам туманнаах тымныытын аахсыбакка, Тымныы Моруос оҕонньорбутун, Хаарчаанабытын тыаҕа илдьэ тахсан, Саҥа дьылы бэлиэтиибит.
Онон бырааһынньыктары ыраас салгыҥҥа бэлиэтииртэн күндү суох, — диэн санаатын үллэстэр Арыылаах нэһилиэгин кулуубун уус-уран салайааччыта Полина Домнина.
Ити курдук, Дьааҥы улууһун Арыылаах нэһилиэгэр биир дойдулаахтарыгар холобур буолар «Доруобуйа ыллыга» уопсастыбаннай кулууп, аны бу ыстатыйаны аахпыт өрөспүүбүлүкэ уопсастыбанньыктарын көҕүлүө буоллаҕа. Бырааһынньыктары дьааҥылар курдук ыраас салгыҥҥа хааман бэлиэтиэҕиҥ!
Елена ПОТОЦКАЯ, «Саха сирэ» хаһыат, edersaas.ru
Хаартыскалары «Доруобуйа ыллыга» кулууп архыыбыттан туһанным.