Алтынньы 29 күнүгэр дойду үрдүнэн хомсомуол тэриллибитэ 100 сыла. Онон сибээстээн, бүгүн биһиги төлөннөөх сүрэхтээх хомсомуол далааһыннаах үлэтиттэн быһа тардан билиһиннэрэбит.
Модун күөнүгэр ыччаты түмэ тардыбыт хомсомуол үлэтинэн-хамнаһынан сөҕүмэр ситиһиилэри оҥорбута устуоруйаҕа киирэн, сурукка тиһиллэн көлүөнэттэн көлүөнэ өйүгэр-санаатыгар иҥэр. Ол курдук, гражданскай сэрииттэн саҕалаан үлэ бэтилиэккэлэригэр ыччат кыттыыта, Аҕа дойду Улуу сэриитин сылларыгар хорсун быһыылара, уоттаах сэрииттэн урусхалламмыт куораттары тутуулара, собуоттары, баабырыкалары, холкуостары, сопхуостары өрө көтөҕүүлэрэ, чөлүгэр түһэрсиилэрэ, олох-дьаһах сайдыытыгар кыттыылара, инники күөҥҥэ туруулара кэнчээри ыччакка үтүө холобур буолуох тустаах.
Баараҕай тутуулар
Хомсомуол ханна да өрүү инники кирбиигэ сылдьара. Кини Ийэ дойдуга бэриниилээх, үлэҕэ-хамнаска, үөрэххэ-сайдыыга, билиини-көрүүнү хаҥатыыга өрүү бастакы кэккэҕэ сылдьыахтааҕа, дьоҥҥо-сэргэҕэ үтүө холобур буолуохтааҕа.
Ол кэккэтинэн, Саха хомсомуола ханна да өрүү үтүө уонна бастыҥ холобур буолара. Маныаха, өрөспүүбүлүкэбит үлэтинэн-хамнаһынан аар саарга аатырыыта, биллиитэ-көстүүтэ эмиэ хомсомуолу кытта ыкса ситимнээх.
Саха сирин хомсомуоллара БАМ-ы, АЯМ-ы тутууга көхтөөхтүк кыттыбыттара. Бу дойдубут историятыгар биир саамай дьоһуннаах миэстэни ылар.
Удачнайы тутууга хомсомуол сүрүн күүс буолбута. 1987 с. бөһүөлэк куорат статустаммыта.
Нерюнгри куораты тутуу үлэтэ күргүөмнээхтик саҕаламмыта. Манна аан бастакынан Хомсомуол аатынан уулусса баар буолбута.
Депутатскайдааҕы хайаны байытар кэмбинээти тутууга хомсомуоллар төһүү күүс буолбуттара.
Аар тайҕа ортотугар Мииринэй куораты дьэндэтиигэ хомсомуоллар кылааттара сүҥкэн. Элбэхтэн биир ураты үтүө холобур, 1959 с. Дьокуускай 2-с №-дээх орто оскуолатын 10 «б» кылааһын 22 үөрэнээччитэ тутуспутунан (учууталлара Зоя Михайловна Миндиярова) Мииринэйи тутууга үлэлээбиттэрэ.
Амма кырыс сирин баһылаабыттара. Саха сирин араас оройуоннарыттан кэлбит эдэркээн ыччаттар Аммаҕа – Мээндигини, Сэргэ Бэһи, Тааттаҕа – Даайа Амматын туппуттара.
Сардаана БАСНАЕВА, «Саха сирэ» хаһыат, edersaas.ru