Хомсомуол 100 сылыгар «Сэргэлээх уоттара» КК «Сахамедиа» холдинг өрөспүүбүлүкэҕэ биллэр-көстөр фотосуруналыыс Владимир Доброхотов хаартыскаларынан быыстапкатын үөрүүлээх быһыыга-майгыга арыйда.
Ый устата салҕанар быыстапкаҕа барыта 104 истиэндэ, 400 хаартыска бар дьон көрүүтүгэр-истиитигэр туруорулунна. Манна БАМы тутуу күргүөмнээх үлэтин, хомсомуол ыччат олоҕун-дьаһаҕын, үлэтин-хамнаһын, ЫБСЛКС сийиэстэриттэн чаҕылхай түгэннэри, тыа сирин ыччатын сыратын, үөрүүтүн, эдэр саас дьоллоох кэмнэрин санатар, оччотооҕу кэмҥэ эргитэн ыалдьыттатар хаартыскалар болҕомтону тардаллар.
— Дойдубутун сайыннарарга оччотооҕу ыччат өрө көтөҕүллэн үлэлээбит кэмнэрин санатар хаартыскаларынан быыстапканы тэрийдибит. Бу быыстапка улахан суолталаах. Кэнчээри ыччат манна сылдьан хомсомуол туһунан элбэҕи билиэ-көрүө, өйүгэр-санаатыгар умнубаттыы иҥэриниэ, — диэтэ үөрүүлээх тэрээһиҥҥэ мустубут бар дьоҥҥо туһаайан холдинг генеральнай дириэктэрэ Алексей Чертков.
Кини солбуйааччыта Афанасий Ноев:
— Бүгүн бу долгутуулаах күҥҥэ, ураты саалаҕа оччотооҕу хомсомуоллары кытары эдэр ыччат кэлбитэ үөрүүлээх. Тоҕо диэтэххэ, ол эдэр ыччат аҕа саастаахтарга ытыктабыллаахтарын, болҕомтолоохторун, ааспыт олоҕу, дьонноро-сэргэлэрэ, уруулара-аймахтара үлэлээбит кэмнэрин сүрэхтэригэр чугастык туталларын, истиҥ сыһыаннарын көрдөрөр. Ааспыт үйэ 60-70-с сыллардааҕы хаартыскалартан элбэҕи билиэхтэрэ диэн эрэнэбин», — диэтэ.
«Сэргэлээх уоттара» КК дириэктэрэ Светлана Никифорова Владимир Доброхотов манна, култуура киинигэр, иккис быыстапката буоларын этэр.
— Аҕыйах сыллааҕыта кини Улуу Кыайыы күнүгэр аналлаах быыстапкатын тэрийбитэ болҕомтону наһаа тардыбыта, — диир Светлана Рафаиловна. — Онон бу хомсомуол үбүлүөйдээх сылыгар анаабыт быыстапката хара саҕаланыаҕыттан уратытык өрө көтөҕүллэн ыытылынна. Тэрээһиҥҥэ оччотооҕу хомсомуоллар историяҕа киирбит хаартыскалары көрөн, үлэлээбит кэмнэрин санаан сүрдээҕин астыннылар, үөрдүлэр-көттүлэр. Маныаха маннык долгутуулаах түгэҥҥэ Владимир Доброхотовка дохсун ытыс тыаһыгар доҕуһуоллатан Хомсомуол 100 сылыгар аналлаах уордьан туттарылынна. Сылдьыбыт дьон бары сүргэлэрэ улаханнык көтөҕүлүннэ. Аны биһиги түһүлгэбитигэр ыалдьыттары улахан кэнсиэрдээх, мунньахтаах дьоро киэһэҕэ күүтэбит, — диэн санаатын үллэһиннэ.
Биһиги корр., «Саха сирэ» хаһыат, edersaas.ru
Андрей Сорокин (СИА) хаартыскаҕа түһэриилэрэ.