Хаһыакка Хомсомуол 100 сылын көрсө хомсомуол значоктарын туһунан тахсыбыт матырыйаалы олус сэргии, биһирии көрдүм, аахтым. Итиэннэ санаабын үллэстэн суруйарга быһаарынным.
Мин ыраах Эбээн Бытантай сирин Дьарҕаалаах бөһүөлэгиттэн төрүттээхпин. Билигин сиэммин көрөн Дьокуускай куоракка олоробун. Хаһыаттар тахсыбыт күннэригэр тута ылан ааҕабын.
Сэбиэскэй кэм оҕото буоларбынан, бу хаартыскаҕа көстөр бары значоктары иилиммит дьоллоох эбэ буоллаҕым. Дойдум устуоруйатын ытыктыыбын, кэлэр көлүөнэҕэ ону хайдах сатыырбынан тиэрдэбин.
Ааспыт үйэ биһиги дьиэ кэргэни кытары ыкса сибээстээх. Ол курдук, мин таай эһэм, сэрии кыттыылааҕа Афанасий Семенович Садовников (Сотрудников) биһиги бөһүөлэкпитигэр оскуола аанын аан маҥнай арыйбыта. Ийэм Елизавета Егоровна Старостина бастакы үөрэнээччи, октябренок буолар үрдүк чиэскэ тиксибит киһинэн буолар. Тус бэйэм Сэбиэскэй Сойуус ыһыллыар диэри хомсомуол үрдүк аатын чиэстээхтик сүкпүтүм. Билигин да хомсомуолум билиэтин харыстаан илдьэ сылдьабын.
Оҕо саас умнуллубат үтүө кэмнэрин үчүгэйин бары сомсубут аҕа табаарыстарбын, үөлээннээхтэрбин ЫБСЛКС 100 сыллаах үбүлүөйүнэн үөрэн-көтөн туран итиитик-истиҥник эҕэрдэлиибин.
Вера СЛЕПЦОВА, «Саха сирэ» хаһыат, edersaas.ru саайтка анаан.