Киин, илин эҥээр уонна Бүлүү эргин улуустар олохтоохторо үүт туттаран дохуоттанар буоллахтарына, хотугу улуустар балыгы соҕотуопкалаан үптэнэллэр.
edersaas.ru
Бу салааҕа сүрүннээн Абый, Аллайыаха, Аллараа Халыма, Булуҥ, Орто Халыма, Усуйаана уонна Эдьигээн улуустарын хаһаайыстыбалара идэтийэллэр. Ааспыт сыл устата барыта холбоон 4,4 тыһ. туонна балыгы соҕотуопкалаан, былааннарын 108 % толорбуттара. Арктика дьыалаларыгар судаарыстыбаннай кэмитиэт балыгы батарыыга ааспыт сылларга “Саха сирин балыга” диэн өрөспүүбүлүкэтээҕи быыстапка-дьаарбаҥкатын олохтообута үтүө үгэскэ кубулуйбута.
Билигин ити үгэһи Тыа хаһаайыстыбатын министиэристибэтэ салгыыр. Ол курдук, бу өрөбүл күннэргэ Хомсомуол болуоссатыгар быйылгы сыл бастакы быыстапка-дьаарбаҥката ыытылынна. Субуота күн сарсыарда 9 чаастан хаһаайыстыбалар балык арааһын аҕаланнар остуолларга өрөһөлүү уурдулар.
Киин куорат олохтоохторугар балык кэһиилээх кэлбиттэр эбит: Аллайыахаттан «Аллайыаха» аҕа ууһун общината, Ступень Е.А. биирдэм тэрилтэтэ, Аллараа Халыматтан «Походскай» кэпэрэтиип, Усуйаанаттан «Фактория и Ко» ХЭТ, «Усуйаана», «Чысхаан» кэпэрэтииптэр, «Балык-Ас» ХЭТ, «Якутская рыба» ХЭТ, «Туймаада-Агроснаб» ААУо. Барыта уон алта хаһаайыстыба.
Быыстапка аһыллыытын сиэрэ күнүс 12 чаастан буолла. Бары мустубут дьону тыа хаһаайыстыбатын миниистирэ Александр Атласов, «Эргиэн-промышленнай балаата» союз бэрэсидьиэнэ Владимир Членов уонна «Булуҥ» МУТ дириэктэрэ Руслан Лукин эҕэрдэлээтилэр, бу сааскылыы чаҕылхай күҥҥэ куорат олохтоохторугар элбэх балыгы атыылаһалларыгар, оттон хаһаайыстыбалар балыктарын батаран баралларыгар баҕаларын эттилэр. Күнүс биир чаастан тэрээһиҥҥэ мустубут дьону балык миининэн күндүлээтилэр.
Балыксыттар эрэ буолбакка, сир аһын батарааччылар эмиэ бааллар. Уус Маайа улууһун Ааллаах Үүнүттэн моонньоҕон уонна малина аҕалбыттар.
Бүгүн быыстапка салҕанар. Түмүк киэһэ 6 чаастан таһаарыллыаҕа, төһө киһи сылдьыбыта итиэннэ төһө балык батарыллыбыта онно этиллиэҕэ.
Раиса СИБИРЯКОВА, «Саха сирэ» хаһыат, edersaas.ru