Хоммут уоспун өһүлэн…

Ааптар: 
Бөлөххө киир:

Бу күннэргэ “Саха сирэ” “Манчаары”, “Кыым” хаһыаттары утумнааччы судаарыстыбаннай хаһыат тахсыбыта 100 cылын бэлиэтиир. Мин 1993 с. эдэр суруналыыс, социолог “Саха сирэ” хаһыакка кылаабынай эрэдээктэрим Баһылай Баһылайабыс Кириллин ыҥырыытынан социальнай көмүскэлгэ салаа сэбиэдиссэйинэн киирбитим. Уонна… 16 сыл хайдах күлүм гынан ааспытын өйдөөмүнэ хаалбытым.

Оннук өрө күүрүүлээхтик, таһаарыылаахтык, айымньылаахтык үлэлээбиппит! Бастакы халыҥ нүөмэри таһаарыыны миэхэ сүктэрбиттэрэ, онно биэс сыл редактордаан баран, “Саха ыала” диэн хаһыат иһигэр хаһыаты тэрийэн таһаарбыппыт. Наар Дылҕабар махтанабын – үлэттэн толору дьоллонуу диэни билбитим иһин.

“Саха сирэ” хаһыакка дьиҥнээх суруналыыстар бааллара даҕаны, бааллар даҕаны. Кинилэр дьону өмүтүннэрэ сатаан айдаарбат буолан биллибэт курдуктар. Чуумпуран олорон өй уонна дууһа үлэтин толороллор. Норуокка үйэлээҕи суруйан хааллараары буола турар быһыыны-майгыны кырдьыктаахтык суруйан, үлэһит дьону өрө тутан, аныгы олоҕу сиэрдээхтик сырдата сылдьаллар. Кэлэр көлүөнэ кинилэр суруйууларын ааҕан, аныгы кэми билиэҕэ. Күннээҕинэн хаалар иһитиннэриинэн буолбакка, олохтоохтук анааран суруйар суруналыыстар үлэлэриттэн элбэҕи сомсуохтара. Ол чуолкай. Дьиҥэр, сахалыы үчүгэйдик суруйар суруналыыстар тарбахха баттаналлар эбээт. Сорох салайааччылар уопуттаах суруналыыстары аанньа ахтыбаттар да, историяны суруйааччылар – кинилэр буоллаҕа. Ордук хаһыатчыттар. Хаһыаттары национальнай бибилэтиэкэ сыа-сым курдук тутан уурунара олус да хайҕаллаах! Онон биир идэлээхтэрим дууһаларын ууран суруйбуттара-бичийбиттэрэ үйэлээх дьыала. Ханнык даҕаны бэйэлээх көмпүүтэр суруналыыс кыраҕы хараҕынан көрөн, анааран суруйбутун курдук суруйар кыаҕа суох. Хайа да сайдыы кумааҕы кинигэлэри, хаһыаттары-сурунааллары солбуйар кыаҕа суох. Цифровизация олохпутун чэпчэтэр эрээри мэйии, өй-санаа үлэтин кэһэр.

Түгэнинэн туһанан биир этиибин суруйуум. Ил Дархан судаарыстыбаннай бэчээти өйүүр сыалтан, суһал иһитиннэриитин, Дьаһалларын-ураахтарын аан маҥнай бэйэтин бэчээтин уорганыгар таһаарыахтаах, дьэ, онтон атын хааһы курдук элбээбит сайтар, пабликтар иилэ хабан ылыахтаахтар. Дьиҥэр, бу судургу дьыала. “Саха сирэ” билигин кумааҕынан эрэ буолбакка, бары социальнай сиэттэринэн тарҕанар эбээт.

Биир идэлээх ытыктыыр дьоммун, дьоһуннаахай үбүлүөйүнэн эҕэрдэлиибин! Үйэлэргэ хаалар суруйууларынан иитиэҕиҥ дьоммутун, киһи-аймах уларыйбат сыаннаһын өрүү өрө тутан, күннээҕи сирэй көрбөххө киирэн биэрбэккэ айыаҕыҥ-тутуоҕуҥ!

Айталина Шадрина-Никифорова, РФ Суруналыыстарын Сойууһун, СӨ Суруйааччыларын Сойууһун чилиэнэ,

СӨ Бэчээтин туйгуна, СӨ Бырабыыталыстыбатын, Ил Түмэнин Бочуоттаах грамоталарынан наҕараадаламмыта,

2006 с. аата Россия прессатын кыһыл көмүс пуондатыгар киирбитэ. Аҕыс уус-уран кинигэ ааптара.

+1
0
+1
0
+1
0
+1
0
+1
0
+1
0
+1
0