Холуонньаларга итэҕэлинэн экстремизми сэрэтиигэ «төгүрүк остуол» ыытылынна
РФ Накаастабылы толорор федеральнай сулууспатын Саха сиринээҕи управлениетыгар бу дьыл от ыйын 6 күнүгэр холуонньаларга итэҕэлинэн экстремизми сэрэтиигэ аналлаах «төгүрүк остуол» аан бастакытын ыытылынна.
Манна Саха сиринээҕи уонна Ленскэйдээҕи епархия протоиерейа, Накаастабылы толорор управление начальнигын итэҕэл боппуруоһугар көмөлөһөөччүтэ Михаил Павлов, мусульманнар Дьокуускай куораттааҕы тэрилтэлэриттэн имам-хатиб Хабиб Хигматов, буддийскай общинаттан Саха сиринээҕи дацан тарлам-ламата Руслан Давлетов итиэннэ управление, холуонньалар үлэһиттэрэ кытыннылар.
Управление начальнига, ис сулууспа полковнига Владислав Дзюба «төгүрүк остуолу» аһарыгар бэлиэтээбитинэн, өрөспүүбүлүкэ буруйу боруостуур учреждениеларыгар бу эйгэҕэ быһыыны-майгыны ураты хонтуруолга тутар буоланнар, этэҥҥэ. Ол эрэн, тус-туспа итэҕэллээх дьоҥҥо иллээх-эйэлээх сыһыан олохтоноругар итэҕэл тэрилтэлэрэ өйдөрүн-санааларын, күүстэрин-сыраларын ууран, түмсүүлээхтик үлэлииллэригэр ыҥырда. Онуоха управление өттүттэн өйөбүл уонна көмө баар буолуоҕун эрэннэрдэ.
Буруйдарын боруостаан олорооччулартан төһө киһи туох итэҕэли тутуһарын, ханнык тутуулар баалларын холуонньалар начальниктарын иитэр үлэҕэ солбуйааччылар биир-биир иһитиннэрдилэр итиэннэ итэҕэл тэрилтэлэрин кытта үлэлэһэргэ бэлэмнэрин биллэрдилэр.
Духовенство бэрэстэбиитэллэрэ омуктар икки ардыларыгар иирсээни, атааннаһыыны күөртүүр баҕалаахтар хаайыыга олорооччулар итэҕэл боппуруостарын ситэ билбэттэринэн, өйдөөбөттөрүнэн туһаныахтарын сөп диэн санааҕа сөбүлэһэн, бэйэлэрин этиилэрин киллэрдилэр.
Бастакы «төгүрүк остуол» түмүгүнэн, мантан инньэ бу курдук сыл аҥаарыгар көрсүһэн санаа атастаһарга, ону таһынан, холуонньаларга бииргэ сылдьан, терроризмы, экстремизми сэрэтэр, итэҕэли тарҕатар үлэлэрин тэтимирдэргэ быһаардылар.
Вера МАКАРОВА, «Саха сирэ» хаһыат, edersaas.ru
Хаартыскалар: Накаастабылы толорор управление пресс-сулууспата.