Бу туһунан РФ Накаастабылы толорор федеральнай сулууспатын Саха сиринээҕи пресс-сулууспата иһитиннэрдэ.
Вера МАКАРОВА, «Саха сирэ» хаһыат, https://edersaas.ru/
Ол курдук, холуобунай-исполнительнай систиэмэ оперативниктара хаайыыга бобуулаах маллары киллэриини сэрэтэр үлэлэрин кэмигэр хас да оннук чахчыны буллулар.
Дьокуускайдааҕы 1 №-дээх кытаанах эрэсиимнээх холуонньа олбуорун таһыгар, хаарга кистэммит бакыаты буллулар. Онно 11 суотабай төлөпүөн, 11 ииттэрэр тэрил итиэннэ 5 гарнитур бааллар эбит. Бу бобуулаах маллары кимнээх эрэ олбуор нөҥүө быраҕаары былааннаабыттара кэмигэр бохсуллан, сатаммата. Билигин бу чахчынан бэрэбиэркэ ыытыллар.
Оттон Үөһээ Бэстээхтээҕи 3 №-дээх уопсай эрэсиимнээх холуонньаҕа 8 суотабай төлөпүөнү, 2 лиитэрэ испиирдээх утаҕы киллэрэ сатаабыттар. Эмиэ бэрэбиэркэ барар.
Оттон Мохсоҕоллооххо баар 6 №-дээх кытаанах эрэсиимнээх холуонньаҕа С. диэн дьахтар буруйун боруостаан олорор П. диэн киһиэхэ аҕалбыт баһыылкатыттан 15 суотабай төлөпүөнү, 12 ииттэрэр тэрили, 8 переходнигы, 3 кулгаахха иилэри, 1 суотабай төлөпүөн каартатын уонна 80 г доруоһаны булбуттар. Бу дьахтарга административнай дьыала тэриллэн, мировой суут көрүүтүгэр барбыт.
Накаастабылы толорор управление санатар: РФ Административнай кодексатын 19.12-с ыстатыйатынан буруйдаммыт киһи 3 тыһ. солк. — 5 тыһ. солк. суумалаах ыстараап төлүүрүн ааһан, ити аҕалбыт малларын, бородуукталарын былдьатар.
Вера МАКАРОВА, «Саха сирэ» хаһыат, https://edersaas.ru/
Хаартыскалар: УФСИН пресс-сулууспата.