Холуонньалар үлэһиттэрин ыһыаҕа футбол чемпионатыгар ананна
Өрөспүүбүлүкэ холуобунай-исполнительнай систиэмэтин үлэһиттэрин ыһыаҕа куруук бэрт сэргэхтик, тэрээһиннээхтик уонна уратытык ыытыллар. Былырыыҥҥы ыһыахтара Экология сылыгар анаммыт эбит буоллаҕына, быйылгылара Футбол чемпионатыгар ананна.
Ону сырдатыам иннинэ, иллэрээ сыллааҕы, Киинэ сылыгар анаммыт ыһыахтарын санатан аһарыым. Онно холуонньалар, отделлар хас биирдии хамаандалара урукку сэбиэскэй киинэлэртэн, остуоруйалартан сөбүлүүллэрин талан ылан, тиэмэлэрин онно анаабыттара.
Ол курдук, “Ирония судьбы или С легким паром!”, “Три мушкетера”, “Свадьба в Малиновке”, “Цыган. Возвращение Будулая”, “Операция “Ы”, “Кавказская пленница”, “Приключения Буратино” уо.д.а киинэлэр дьоруойдарын илэ харахпытынан көрбүппүт. Маныаха киһи кэрэхсиирэ диэн — ыһыахтарыгар үлэһиттэр оҕолоро эмиэ көхтөөхтүк кытталлар.
Бу накаастабылы толорор уорганнар ыһыахтарыгар сылын аайы сылдьар киһи бииртэн сөҕөбүн – ханнык да тиэмэҕэ ананнын, көстүүмнэригэр, атрибутикатыгар тиийэ ымпыктаан-чымпыктаан, улахан эппиэтинэстээхтик сыһыаннаһан бэлэмнэнэллэрин. Быйыл да сүрдээҕин кыһаллан, сыраларын ууран бэлэмнэммиттэрэ ала-бэлиэ.
Ыһыах хамаандалар стройдаан киирэн, бэйэлэрин билиһиннэриилэриттэн уонна былаахтары өрө таһаарыыттан саҕаланна. Ол кэнниттэн алгысчыт аал уоту оттон, Үрдүк Айыыларга айах тутан, ыһыах аһыллыытын сиэрин-туомун толордо.
Саамай интэриэһинэй түһүмэх — дьүүллүүр сүбэ чилиэннэрэ түһүлгэлэри кэрийэ сылдьан сыаналааһыннара. Быйылгы түһүлгэлэри футбол тиэмэтигэр анаабыттар. Буоларын курдук, түһүлгэлэрин бэрт сиэдэрэйдик киэргэтэн, саха маанылаах астарын — саламааттан саҕалаан, сылгы хартатыгар тиийэ — астаан аҕалан, сүрдээҕин кыһаллыбыттар.
Эбиэттэн киэһэ «Спортивнай дьиэ кэргэн» уонна киэһэлик мас тардыһыытыгар, хапсаҕайга уонна ханаат тардыһыытыгар ыһыылаах-хаһыылаах, бэрт тыҥааһыннаах күрэхтэһиилэр ыытылыннылар.
Дьүүллүүр сүбэ быһаарыытынан, уопсай түмүккэ кыайыылааҕынан хонбуойдааһын отделын хамаандата буолла. Улахан Мархатааҕы 5-с №-дээх эмтиир-көннөрөр холуонньа хамаандата иккис миэстэҕэ тигистэ, оттон үһүс миэстэҕэ Силиэстийэлиир изолятор хамаандата таҕыста.
Вера МАКАРОВА, «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.
