Дьокуускай куорат 1-кы №-дээх полиция салаатыгар куорат олохтооҕуттан үҥсүү киирдэ. Дьахтар куортамныыр дьиэтиттэн холодильнигын уорбуттар.
Тахсыбыт хоромньу суумата 10 тыһыынча солкуобайга тэҥнэспит. Эмсэҕэлээччи быһаарбытынан, кини кыбартыыратын куортамҥа биэрэн туруорбут эбит. Төлөбүрүн ыла дьиэтигэр кэлэн баран көрбүтэ, холодильнига сүппүт эбит. Куортамнаан олорооччу сибээскэ тахсыбатаҕа ырааппыт.
Холуобунай ирдэбил үлэһиттэрэ суһаллык көрдөөн, 38 саастаах, маннык дьыалаҕа түбэһэн эрдэ сууттана сылдьыбыт уорбаланааччыны туттулар. Дьыала биллибитинэн, куортамнаан олорооччу арыгыны хото иһэр эбит. Салгыы иһэригэр-аһыырыгар харчыта бүппүтүгэр, куортамнаан олорооччу дьиэҕэ баар холодильнигы атыылыырга санаммыт. Хаһаайка холодильнигын ыйытыыта суох 2 500 солкуобайга атыылаабыт.
Арассыыйа Федерациятын холуобунай кодексатынан «Уоруу» диэн 158 ыстатыйа 2-с чааһынан холуобунай дьыала тэрилиннэ.
Ульяна ЗАХАРОВА, edersaas.ru