Үөһээ Бүлүү улууһун Хоро оскуолатын профсойууһун көҕүлээһининэн, бэҕэһээҥҥиттэн саҕалаан, харыстыыр мааскалары тигии үлэтэ күргүөмнээхтик барар.
edersaas.ru, Үөһээ Бүлүү улууһун дьаһалтатын пресс-сулууспата
Ол курдук оройуон үрдүнэн харыстыыр мааскалар бүппүттэр үһү диэн ыксаллаах быһыы-майгы үөскээтэ диэн уолуйбакка, Хоро оскуолатын профсойууһун үлэһиттэрин харыстыыр сыалтан, 2 рулон матырыйаал атыылаһан, харыстыыр мааскалары тиктэн саҕалаатылар. Матырыйаал төһө тиийэринэн элбэх маасканы тигэн учууталлары, оскуола үлэһиттэрин уонна бэтэрээннэри хааччыйыахтаахтар.
Маны таһынан, кырдьаҕас киһиэхэ истиҥ сыһыан, туһааннаах болҕомто туохтааҕар да күндү диэн санаанан салайтаран, баҕа өттүлэринэн бэтэрээннэри иҥэмтиэлээх үүт аһынан уонна да атын бородууктанан хааччыйыыга, доруобуйаларын туругун туоһулаһыыга дьуһуурустуба олохтонно. Бу маннык үтүө санаа сирдьиттээх хоролор холобурдара атыттары эмиэ үтүө дьыалаҕа кынаттаатын.
Үөһээ Бүлүү улууһун дьаһалтатын пресс-сулууспата