Сахалар сотору-сотору Голливуд “сулустарын” кыттан хаартыскаҕа түспүттэрин, кэнсиэрдэригэр сылдьыбыттарын туһунан сонуннары истэбит, ааҕабыт. Эрэдээксийэбит талбыт алта бастыҥ сонунун бэчээттиибит.
“Мисс Виртуальная Якутия-2016” куонкурус кыттыылааҕа, Саха сириттэн төрүттээх модель Вита (Ависта – дьиҥнээх аата) Миры аатырбыт ырыаһыт Рианна сирэйин оҥордо. Кини Дубайга бэйэтин косметикатын сүрэхтээтэ. Аан дойдуга аатырар “ELLE”, “Cosmopolitan”, “Harpers Bazaar”, “Wedding Vouge” сурунаалларга үлэлэһэр. Вита бэйэтин туһунан маннык кэпсиир:
— Саха сириттэн төрүттээхпин хас биирдии кастиҥҥа, дьону кытта билистэхпинэ кэпсиибин уонна киэн туттабын. Сахабын – дэнэбин. Агентстволар “кореянка, бразильянка булкаастаахпын” дэттэрэ сатаатахтарына даҕаны, аккаастыыбын. Арба, саамай элбэхтэ туттар тылым – сахалыы “айака”. Тоҥ балыгы сөбүлүүбүн. Ийэбэр Саха сириттэн ыытааччылар. Ийэм Зырянка юкагирката. Санкт-Петербурга Хотугу норуоттар институттарыгар юкагир тылын үөрэтэр. Аҕам омугунан перс, Афганистантан төрүттээх беженец этэ. Мир – диэн аҕам араспаанньата. Ависта –“Авеста” диэн персидскэй уус-уран айымньы аатыттан таһаарбыттар.
Голливуд артыыһа Том Харди Саха сиригэр сырыытын туһунан соторутааҕыта “Бастакы” ханаалга кэпсээтэ. Арассыыйаҕа «Веном» киинэтин сүрэхтэниитигэр кэлбит.
«Саха сирин дьоно үөрэ-көтө көрсүбүттэрэ. Аан дойду саамай тымныы сиригэр бүтэһик уоппускабар сынньаммытым. Удаҕан биэрбит харысхала бу сылдьар», — диэн моойугар кэтэ сылдьар киэргэлин көрдөрөр.
Кини 2012 сыллаахха Саха сиригэр кэлэн барбыта. Өймөкөөннүүр суолунан айанныыр сыаллаах Мике Сало диэн Финляндия гонщигын кытта кэлбитэ. Ойбоҥҥо сөтүөлээбитэ, саунаҕа паардаммыта, тоҥ аһылыгы боруобалаабыта, табаларынан хатааһылаабыта уонна ынах ыан көрбүтэ. Уопсайынан, олус интэриэһинэйдик
сылдьыбыта.
Аан дойдуга биллэр артыыс, культурист, бэлиитик Арнольд Шварценеггер мас-рестлинынан утумнаахтык дьарыктанар. 2016 сыллаахха кулун тутар ыйга АХШ Огайо штатын Колумбус куоратыгар Шварценеггер аатынан бэстибээл буолбута, манна мас-рестлинг көрүҥэ киирбитэ. Күрэхтэһии буола турдаҕына, артыыс түһүлгэҕэ чугаһаан, спортсменнар мас тардыһар тиэхиньикэлэрин көрбүтэ. Биллэр мадьынылар Джейкоб Файнерти уонна Мартинс Лицис күрэхтэһэ олордохторуна, селфилээбитэ интериниэт ситимин толорбута. Күрэхтэһии сүрүн судьуйата Уйбаан Белолюбскай Арнольд Шварценеггергэ Саха сириттэн аҕалбыт кэһиитин туттарбыта.
Дьокуускайга олорор худуоһунньук Евдокия Голливуд артыыһа Дэнни Трехо сирэйин джинсы кууркаҕа уруһуйдаабыт уонна Инстаграмҥа страницатыгар таһаарбыт. Онуоха Трехо бэйэтин Инстаграмыгар таһаарбыт уонна «I got your back!» (я тебя прикрою) диэн суруйбут. Кини 1 мөлүйүөн кэриҥэ сурутааччылаах. Дэнни Трехо «От заката до рассвета», «Дети шпионов», «Мачете», «Ягуар», «Инферно», «Хищники» о.д.а. киинэлэргэ оонньообут биллэр артыыс.
2016 сыллаахха Голливуд артыыһа Леонардо Ди Каприоҕа саха норуотун тапталын туһунан бүтүн аан дойду билбитэ. Артыыс 1997 сыллаахха “Титаник” киинэҕэ уһуллан аатырбыта, бу тухары “Оскар” наҕараадаҕа тиксибэтэҕэ күлүүгэ сылдьара. Сүүрбэ сыл ааспытын эрэ кэнниттэн, “Выживший” киинэҕэ Лео сүрүн оруолу толорон, дьэ, күүтүүлээх наҕараадатын ылбыта. Саха сирин Кэрэ Куоларын аатыттан үрүҥ көмүстэн кутуллан оҥоһуллубут чороон тутурдаах “Эллэй” диэн ааттаах статуэтканы Ди Каприоҕа Лос-Анджелестааҕы офиһыгар тиэрдибиттэрэ. Бу туһуттан 144 дьахтар 1 киилэ 386 грамм үрүҥ көмүһү уонна 3,49 грамм кыһыл көмүһү хомуйбута. Аахсыйа “Оскар для Лео” диэн ааттаммыта. Артыыс сахалар “Оскардарын” тутан, “Инстаграмыгар” махтаммыта: “Саха сирин олохтоохторугар, чуолаан, кэрэ аҥаардарыгар улахан махталбын ыытабын”, — диэбитэ. Бу түбэлтэ кэнниттэн кини Саха сиригэр ыһыахтыы уонна киинэ бэстибээлигэр кэлэр үһү диэн сурахтар тарҕаммыттара.
Аан дойдуга биллэр-көстөр актер, кинопродюсер, сценарист, кинорежиссер уонна мусукаан Стивен Сигал “аймахтара – сахалар” диэн дьээбэ-хообо кэпсээн тарҕаммыта. Онтукабыт отой даҕаны кырдьык курдук буолан тахсыбыта. Ол курдук, Сигал «Первэй» ханаалга «Пусть говорят» диэн биэриигэ “Саха сириттэн сыдьааннаахпын” диэн соһуппута. Артыыс этэринэн, соторутааҕыта ДНК тест оҥорбуттар. Ол түмүгүнэн, Байкал күөл аттыгар олорбут омуктары уонна Саха сирин норуоттарын кытта ыкса ситимнээх өбүгэлэрдээх буолан тахсыбыт. Стивен Сигал айбыт аҕата эмиэ Арассыыйаттан хааннаах үһү. «Аймахтарым Сибииргэ бааллар. Бэл, Белоруссияҕа уонна Санкт-Петербурга аймахтардаахпын”, — диэн кини ирэ-хоро кэпсээн турардаах.
Айтана Аммосова, Надежда Самсонова.
«Саха сирэ» хаһыат, edersaas.ru