Бу күннэргэ Нью-Йорк куоракка Холбоһуктаах нациялар (ООН) генеральнай ассамблеяларын штаб-квартираларыгар төрүт омуктар бырааптарын туһунан Декларация ылыллыбыта 10 сыллаах үбүлүөйүгэр «АЛРОСА» акционернай хампаанньа аатыттан социальнай хааччыйыы уонна регионнааҕы сайдыы управление кылаабынай исписэлииһэ Рустам Ефремов тыл эттэ.
Елена ПОТОЦКАЯ, «Саха сирэ» хаһыат, edersaas.ru
Мин кэскиллээх ыччаты кытта бу суолталаах тэрээһиҥҥэ кыттыытын туһунан кэпсэтиибэр сүрүннээн биир өрүккэ болҕомтобун уурдум.
— Тэрээһиҥҥэ «АЛРОСА» хампаанньа аатыттан кыттыыны ыллыҥ дуо? Бу туох мунньаҕый?
— Тэрээһин муус устар 24 күнүттэн ыам ыйын 5 күнүгэр диэри ыытыллар. Форумҥа аан дойду үгүс омуктарын бэрэстэбиитэллэрэ кыттыыны ылаллар. Манна төрүт олохтоох омуктарга сыһыаннаах араас боппуруостар көрүллэллэр. Мин аҕыйах ахсааннаах норуоттар түөлбэлээн олорор сирдэригэр хампаанньа туох производственнай үлэни ыытарын сырдаппытым. Бу Арассыыйатааҕы таһымнаах бөдөҥ промышленнай тэрилтэлэр үлэлиир сирдэригэр социальнай-корпоративнай эппиэтинэһи сүгэллэригэр сыһыаннаах мунньах этэ. Суолталаах тэрээһиҥҥэ Ямало-Ненецкэй уокуруктан, Сахалин уобалаһыттан, Ханты-Мансийскай уокуруктан, Коми Өрөспүүбүлүкэтиттэн эмиэ кыттыыны ылбыттара. Мантан атын хайысхалаах мунньахтарга Арассыыйа регионнарыттан (ол иһигэр Саха сириттэн эмиэ) кыттыбыттара.
— Эн туох ис хоһоонноох дакылааты аахтыҥ?
— Биһиги отделбыт регион социальнай-экэнэмиичэскэй сайдыытыгар үбүлээһин бырагыраамаларын оҥорор. Мин «АЛРОСА» хампаанньа үлэлиир улуустарыгар регионнааҕы уонна муниципальнай былаастары кытта бииргэ үлэлээһин боппуруостарыгар эппиэттээх үлэни толоробун. Дакылаатым ис хоһооно — бу хайысханан туох үлэ барарын, төһө үп- харчы туохха көрүллүбүтүн сырдатыы.
— Рустам Евгеньевич, биир суолталаах боппуруоска тохтуом этэ. Холбоһуктаах нациялар ассамблеяларын үрдүк түрүбүүнэлэригэр саха национальнай көстүүмүн кэтэн тахсыбытыҥ туох төрүөттээҕий?
— Уопсайынан, форум төрүт олохтоох омуктарга аналлаах буолан, бэйэтин национальнай таҥаһын кэтэн сылдьар киһи олус элбэх этэ. Ол курдук, муос-туйах, кыыл-сүөл ойуулаах араас көстүүмнээх дьон – хас хардыы аайы. Мин кыттыбыт мунньахпар бэйэбит омукпутунан көстүүмнээх дьон иккиэ эрэ этибит — мин уонна Ямало-Ненецкэй уокурук бэрэстэбиитэлэ. Атыттар таҥастарыгар кыра атрибутикалаахтар этилэр.
Национальнай көстүүммүн кэтэн, мин саха ыччаттара төрөөбүт дойдубутугар олорон, промышленноска сыстан, аан дойдуга тиийэ аатырар алмаас хостуур хампаанньаҕа үлэлиирбитин билиһиннэрэр соругу туруоруммутум. Ол эбэтэр, сир анныттан хостонор баайтан киирэр нолуокка төрүт омуктар ыччаттара өрөспүүбүлүкэбит сайдыытыгар бэйэбит кылааппытын эмиэ киллэрэбит диэн өйдөбүлү үөскэтии.
… Ити курдук, Ньурба улууһуттан төрүттээх «АЛРОСА» хампаанньа эдэр эппиэттээх үлэһитэ Рустам Ефремов омук сиригэр ыытыллар суолталаах официальнай тэрээһиҥҥэ бэйэтин үлэлиир тэрилтэтин ыытар үлэтин билиһиннэрэн туран, национальнай таҥаһын кэтэн, төрөөбүт дойдутунан киэн туттуу холобурун көрдөрдө.
Елена ПОТОЦКАЯ, «Саха сирэ» хаһыат, edersaas.ru