Бу күннэргэ улуустарга 202 №-дээх ыйааҕы олоххо киллэриигэ кэпсэтии, үөрэтии, дьүүллэһии, дьон санаатын истии-учуоттааһын бара турар.
edersaas.ru
Оҕо тэрилтэлэрин холбоон биир юридическэй тэрилтэ оҥоруу ордук сытыытык дьүүллэһиллэр боппуруоһунан буолар.
Соторутааҕыта сахалыы тыллаах «Саха сирэ» уонна «Кыым» хаһыаттар суруналыыстара — Нина Герасимова уонна мин бу тиэмэни билсэ чугастааҕы Мэҥэ Хаҥалас улууһун нэһилиэктэригэр сылдьан кэллибит. Маныаха, түгэнинэн туһанан, кэлэрбитигэр-барарбытыгар улахан өйөбүлү оҥорбут улуустааҕы Уопсастыбаннай сэбиэт салайааччыта Зиновий Игнатьевка истиҥ махталбытын тиэрдэбит.
Таһыттан-иһиттэн көрдөххө, 2005 сыллаахха үлэҕэ киирбит таас тутуу икки оҕо тэрилтэтэ дьоҕус нэһилиэккэ үлэлииригэр олох бэркэ ананан тутуллубут.
Маннык бырайыактаах тэрилтэлэр олоххо киирдэхтэринэ, олох бэртээхэй буолсу диэн көрдүм. Оҕо тэрилтэлэрэ 2016 сыллаахха холбоһон, биир юридическэй сирэй буолбуттар. Ол эрээри тэрилтэ аатын көрөн баран соһуйдум — “Наахаратааҕы орто оскуола” эрэ диэн ааттаах эбит.
“Холбоһуктаах тэрилтэ буоллаҕына, оччотугар оҕо саада тоҕо ыйыллыбатый?” — диэн толкуй үөскүүр. Мин бу туһунан оскуолаҕа киириэн иннинээҕи саастаах оҕону иитиигэ дириэктэри солбуйааччы Екатерина Абрамоваттан ыйыттым.
— Икки тэрилтэбит эрээри, баһылыыр-көһүлүүр оруолу син биир оскуола ылар. Ол эбэтэр оскуола устаабыгар нууччалыы тылбаастаабакка тиэртэххэ: “Основным предметом и целью деятельности учреждения является образовательная деятельность по образовательным программам дошкольного образования, начального общего, основного общего образования, присмотр и уход за детьми”, — диэн ыйыллыбыт.
Филиал эҥин буолбакка, өҥө оҥорор тэрилтэ курдук буолар. Тэрилтэ төһө үлэһиттээх буоларын оскуола дириэктэринэн таҥыллар. Оҕо уһуйааныгар төһө ыстаат көрүллэрэ бөлөх ахсааныттан тутулуктаах. Ону улуустааҕы үөрэх управлениетын экэнэмиистэрэ быһаараллар. Биһиги 10,5 чаас үлэлиибит. Ол иһин күҥҥэ 4-тэ аһатабыт. Оҕобут ахсаана — 45, оскуола 80 үөрэнээччилээх. Онно үөһэттэн ааҕан-суоттаан аһылык үбүлээһинин оҥороллор, — диэн кэпсиир дириэктэри солбуйааччы, бэрстэбиитэллээх уорган дьокутаата Екатерина Абрамова.
Онон тэрилтэ аата “Мэҥэ Хаҥалас улууһун Наахаратааҕы уопсай үөрэхтээһин уонна оскуолаҕа киириэн иннинэ саастаах оҕону иитиигэ бүддьүөттэн үбүлэнэр холбоһуктаах муниципальнай тэрилтэтэ” диэн ааттаах юридическэй сирэй буолара ордуга дуу? Оччотугар устаапка эмиэ көннөрүү наада. Онон биир юридическэй сирэй буолар оҕо тэрилтэлэрэ докумуоннаргытын толорууга болҕомтоҕутун ааккытыгар ууруоххутун наада эбит. Оччотугар тэрилтэҕит устааба икки тэрилтэ интэриэһин көмүскүө этэ.
Оскуола уонна уһуйаан өҥө эрэ оҥорор тэрилтэлэр дуо?
Таас тутуулаах, толору хааччыллыылах дьиэҕэ көһөн кэлэн, иитээччи көмөлөһөөччүтүн үлэтэ биллэ чэпчээбит.
— Биһиги оскуоланы кытта биир дьиэҕэ олорорбут үчүгэй. Атын уһуйааннар оскуолалартан тэйиччи тураллар. Тэрилтэлэр холбоһуктаах юридическэй сирэй буолбуттарын кэннэ, хаһаайыстыбаннай боппуруостарыгар уустуктары көрсөллөр. Холобура, куукуналара биир буолан, 50 кыраадыс тымныыга оҕо аһын дьиэттэн дьиэҕэ таһыыга, ол ас сойон тиийэр буолуохтаах, — диэн бэлиэтиир Екатерина Степановна.
Оҕо уһуйаанын салайааччыта туспа бүддьүөтэ, бас билиитэ суох буолан, оскуола дириэктэрин илиитин-атаҕын маныыра, кини бүтэһиктээх быһаарыытын күүтэрэ – тустаах салайааччыга соччото суох буолуох курдук. Онон оскуола дириэктэрэ хайдах салайааччы буоларыттан уопсай үлэ-хамнас быһаччы тутулуктаах эбит. Кини нэһилиэк дьоно чөл олохтоох, билиилээх-көрүүлээх, сайдыылаах буола улааталлара оҕо саастан саҕаланарын өйдүүр буоллаҕына – икки тэрилтэ эрэ буолбакка, бүтүн нэһилиэк дьоло. Онон оскуола уонна оҕо саада өҥө эрэ оҥорор тэрилтэлэринэн буолбаттара наада.
Бу курдук кэккэ боппуруостар бииртэн биир тахсан иһэллэрэ чахчы. Ол эрээри юридическэй сирэй буолар тэрилтэ, бастатан туран, болҕомтотун тэрилтэтин аатыгар уурууһу.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.