Алмаастаах түөлбэҕэ – Мииринэйгэ, Удачнайга, Айхалга аан дойду үрдүнэн албан ааттара аатырбыт хоккей чаҕылхай сулустара ыалдьыттыы кэллилэр. Үтүө үгэскэ кубулуйбут «Санаа суһума» спортивнай бэстибээли «АЛРОСА» хампаанньа уонна Арассыыйа хоккейга федерацията тэрийэн ыыталлар.
edersaas.ru
Кулун тутар 21-27 күннэригэр хоккейга маастар-кылаас, алта доҕордуу көрсүһүү, мууска эрчиллии, автограф-сессия уонна «Чөмпүйүөҥҥэ 101 боппуруос» диэн сирэй көрсөн олорон кэпсэтии олохтоохтор успуорка сысталларыгар сүрүн тирэх буолуо. Ыалдьыттар – 1984 сыллаах Олимпийскай чөмпүйүөн Михаил Васильев, 2005 сыллаах Арассыыйа чөмпүйэнээтин үрүҥ көмүс призера Александр Бойков, Гагарин кубогын хаһаайына Игорь Григоренко 6-16 диэри саастаах оҕолору мууска тахсан, шайбаны тутарга, охсорго үөрэтиэхтэрэ, хайдах оонньууру көрдөрүөхтэрэ.
Маастар-кылаас уонна доҕордуу күрэхтэһии түмүгүнэн, бастыҥ көрдөрүүлээх кыттааччыларга Арассыыйа сүүмэрдэммит хамаандатын, КХЛ ЦСКА чилиэннэрэ, 2018 сыллаах кыһыҥҥы Олимпийскай оонньуу чөмпүйүөннэрэ Никита Нестеров, Иван Телегин илии баттаабыт клюшкаларын уонна шайба бэлэхтиэхтэрэ.
Кэлиҥҥи кэмҥэ Мииринэйгэ хоккейынан үлүһүйүү маассабай успуорка кубулуйан эрэр, онон бу тэрээһиҥҥэ тыһыынчанан эдэр ыччат тоҕуоруста.
«Санаа суһума» бэстибээл 2017 сыл ахсынньытыттан ыытыллар. Алмаастаах куоракка аан бастаан баскетбол, акробатическай рок-н-ролл сулустара кэлэн, икки нэдиэлэ устата аһаҕас уруок, маастар-кылаас ыытан барбыттара. «АЛРОСА» хампаанньа успуорка уонна култуураҕа дьоһун ситиһиилээх дьону ыраах күрэхтэһэ баралларыгар үп-харчы өттүнэн куруук өйүүр уонна кинилэри Саха сиригэр ыҥыран, үүнэр көлүөнэни уһуйалларыгар усулуобуйа тэрийэр. Ол курдук, ВТБ биир кэлим лигатыттан, Бүтүн Арассыыйатааҕы спортивнай үҥкүү уонна акробатическай рок-н-ролл, хоккей, спортивнай тустуу федерациятыттан кэлэн оҕолору дьарыктыыллар.
Марианна Тыртыкова, «Саха сирэ», edersaas.ru