Хоту Быйаҥныырга сүөһүлээхтэр дуо?
Аллайыаха улууһун Быйаҥныыр нэһилиэгэр үс ыал сүөһү иитэр. Улуус да үрдүнэн ыллахха, ынах сүөһүнү манна эрэ туталлар. Ол оннугар саамай хойуу, минньигэс сүөгэй Саха сирин үрдүнэн Быйаҥныырга эрэ баар дииллэр. Онон кыра нэһилиэккэ бу аҕыйах ыал сыраларынан сүөһү эстибэккэ иитиллэр. Хата, Саҥа 2021 сылы көрсө икки сибиинньэ төрөөбүт. Кэтэх хаһаайыстыбаларга уопсайа 18 төрөөбүт.
Нэһилиэккэ маны таһынан 21 сылгылаахтар. Баһылык Анастасия Большакова этэринэн, бу ааспыт сылга муниципальнай бырагырааманан эбиэс, уотурба аҕалан, кэтэх хаһаайыстыбаларга түҥэппиттэр. Бу уустук суоллаах-иистээх хоту дойдуга тыа хаһаайыстыбатын салаатынан дьарыктанааччыларга дьоһун көмө буолбут. Олохтоохтор сүөһүнү-сылгыны иитиэ эбиттэр даҕаны, эбиэс, уотурба аҕалтараллара ыарахан, уустук, онон дьаһалта көмөтүнэн уонна бэйэлэрэ оттоон, сүөһүлэрин туталлар.
Онон саҥа үүммүт сылга Быйаҥныырга кэтэх хаһаайыстыба сайдыа диэн эрэнэбит.
Бэлэмнээтэ Женни Стрюкова
Хаартыска: Быйаҥныыртан ыыттылар