Хочоҕо таас дьиэ тутуллан эрэр

Ааптар: 
Бөлөххө киир:

Урут өрөбөлүүссүйэ иннинэ сахалар кыракый чоҥкучах алаастарынан бур-бур буруо таһааран олорбуттара. Билигин атын кэм, балысхан сайдыы долгунугар оҕустаран, үгүс тыа дьоно куорат диэки дьулуһаллар. Тыа сирэ, дэриэбинэ эстиэ диэн тиэмэҕэ элбэх кэпсэтии, мөккүөр бара турар. Сылын аайы тыа ыаллара сүөһүлэрин эһэр кыһалҕаҕа киирэллэр. Оттон этэ — үүтэ суох биһиги, саха дьоно, хайдах буолабыт?

Дьэ, ол иһин сүрүн болҕомто билигин тыа ыалын олоҕун чэпчэтиигэ ууруллар.

Саха сиригэр “Саахалланар туруктаах дьиэ-уот пуондатыттан гражданнары көһөрүү эрэгийиэннээҕи аадырыстаах бырагыраама”  (“Хаарбах дьиэ”) диэн бырагыраама тыа  сирин сайыннарыыга, дьон олоҕун уйгутун тупсарыыга киэҥ далааһыннаахтык үлэлии турара хайҕаллаах.

Тустаах бырагыраама чэрчитинэн Мэҥэ Хаҥалас улууһун Хочо бөһүөлэгэр үс этээстээх 23 кыбартыыралаах таас дьиэ тутуллар буолла. 2013 сыллаахха Хочо бөһүөлэгин уу ылан, элбэх ыал дьиэтэ эмсэҕэлээбитэ. Ону хамыыһыйа көрөн баран, 36 ыалы “Хаарбах дьиэ” бырагыраамаҕа киллэрэн турар. Ол кэмтэн ыла аҕыс сыл ааһа охсубут эбит! Дьэ, балай да өр кэтэспит кэтэһиилэрэ быйыл олоххо киириэх курдук!

Бу күннэргэ таас дьиэ тутуллар сирин хаарын күртэрэн, буор тиэйиитэ саҕаланна. Тутуу матырыйаалларыттан сыбаайалары, цемени аҕалан сүөкээтилэр. Тутууну салайааччы — Сахастройсервис ХЭТ, генеральнай дириэктэр Максимов Прокопий Семёнович, прораб — наахаралар бэйэбит ыччаппыт — Устинов Иннокентий Олегович.

Бу дьиэ тутуллан бүттэҕинэ,  23 ыал көһөн киириэхтээх. Онон били, этэргэ дылы, муус хамсаата, аны саҥа таас дьиэ дьэндэйэн, аанын тэлэччи аһарын күүтэбит.

Елена Прокопьева, уопсастыбаннай кэрэспэдьиэн.

Хаартысканы: ааптар ыытта.

+1
0
+1
0
+1
0
+1
0
+1
0
+1
0
+1
0