Саҥа билсибит киһигитин, дьоҥҥутун дьиэҕитигэр ыҥырымаҥ, илдьимэҥ, тугунан түмүктэниэ биллибэт диэн куруук сэрэтэн суруйабыт да, хаһыаты, интэриниэти аахпат өттө ону билээхтээбэт, наадыйбат буоллаҕа.
Ол курдук, Дьокуускай куорат полициятын 3 №-дээх отделыгар биир кыыс дьиэтиттэн тэлэбиисэрин уорбуттарын туһунан сайабылыанньа киллэрбит.
Оперативниктар бу уорууга уорбаланааччыны сотору кэминэн туппуттар — ханна да үлэлээбэт, урут халааһыҥҥа түбэһэн сууттана сылдьыбыт 18 саастаах уол эбит.
Барыллаан быһаарыынан, кыыс уулуссаҕа икки эдэр киһини кытта билсибит уонна дьиэтигэр ыҥырбыт. Билсиһиини бэлиэтээн, арыгы испиттэр, онтон хаһаайка утуйан хаалбыт.
Ыалдьыттарыттан биирдэстэрэ бараары туран, тэлэбиисэри ылан тахсыбыт. Онтун 3000 солкуобайга атыылыы охсубут.
Бу чахчынан «Уоруу» ыстатыйанан холуобунай дьыала тэриллибит. Бу ыстатыйанан көрүллэр накаастабыл миэрэ — улааппыта — 5 сылга диэри болдьоххо көҥүлү быһыы.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.