Аан дойду үрдүнэн сыстыганнаах ыарыы өрө туран, эмчиттэр күнүстэри-түүннэри ыалдьыбыт дьону өрүһүйүүгэ сылдьаллар.
edersaas.ru
Онон хоһоонньуттар үрүҥ халааттаах аанньалларга махтанан, хоһоон аныыллар. «Уран тыл оһуора» түмсүү салайааччыта Раиса Тимофеева-Михайлова айбыт хоһоонун билиһиннэрэбит.
Онтон бу СӨ Суруйааччыларын сойууһун чилиэнэ Михаил Иванов-Чуона Мэхээлэ хоһооно:
Бокулуон уурабын…
Айыыһыт алгыһын ылааччы
Быраастар эһиги буолаҕыт,
Бар дьоҥҥут иннигэр дуораччы
Андаҕар тылларын этэҕит.
Көстүбэт өстөөхтүүн сэриигэ
Сылдьаҕыт инники кирбиигэ,
Өлүүнү кытары киирсиигэ
Көмөҕө аан бастаан кэлэҕит.
Ыарахан ыарыыга ылларбыт
Кэтэһэр эрэлэ — эмчитэ,
Киирэҕит сыдьаайа сандаарбыт
Күн уотун сырдыгын кэриэтэ.
Этэҥҥэ сылдьаммыт биһиги
Ардыгар аахайбат эбиппит —
Дьон сэргэ олоҕор эһиги
Тыын биэрэр салгыҥҥа тэҥнээххит.
Үтүөнү баҕарар санааҕыт
Халааккыт өҥүнүү сып-сырдык,
Сүрэхтэн этиллэр тылларгыт
Эмэ суох эмтииллэр… Ол кырдьык!
Эһиэхэ махталбын этэргэ
Мин тылым дьадайар эмискэ,
Ол иһин, тобуктаан тураммын
Сир уола бокулуон уурабын…
edersaas.ru