Саха норуодунай бэйиэтэ, ССРС суруйааччыларын Сойууһун чилиэнэ Бүөтүр Тобуруокап төрөөбүтэ 100 сылынан, кырачааннарга хоһоон түһүлгэтэ тэриллибит.
Дьокуускай куорат 39-с нүөмэрдээх «Остуоруйа дойдута» оҕо саадыгар (сэбиэдиссэй Надежда Андреева) оскуолаҕа киириэн иннинээҕи саастаах оҕолор хоһоон ааҕыытыгар күрэхтэспиттэр. Иитээччилэр Анисия Белолюбская, Вероника Васильева бу долгутуулаах тэрээһиҥҥэ оҕолорун кыһаллан бэлэмнээбиттэрин төрөппүттэр бэлиэтииллэр. Уран тыллаах ытык бэйиэт туһунан эбии үөрэхтээһин педагога Любовь Федорова кырачааннарга олус үчүгэйдик кэпсээн, кинигэлэри көрдөртөөн болҕомтону тардыбыт. Салгыы түһүлгэҕэ ыллам ырыа дьиэрэйэн, саала иһэ ырыанан туолбута ураты иэйиини, үөрүүнү сахпыт.
Долгутуулаах күрэхтэһиигэ Лиза Краснова “Танюша туһунан” хоһоону сахалыы доргуччу ааҕан, ытыс тыаһынан арыалламмыт. Саша Нащекин уонна Илья Прянишников «Чабырҕах азбуканы” эмиэ сахалыы ыраастык ааҕаннар, саалаҕа мустубут көрөөччүлэрин улаханнык үөрдүбүттэр. София Цао “Күөрэгэйдиин көрсүһүүнү”, Эрчим Григорьев эмиэ «Чабырҕах азбуканы” ааҕаннар, төрөппүттэр хайҕалларын ылбыттар.
Төрөппүттэр тэрээһинтэн улаханнык астыммыттар, кырачааннары хайҕаабыттар, тэрийээччилэргэ махтаммыттар. Оҕолору түмэр, сомоҕолуур маннык дьоро күннэр тиһиктээхтик ыытылла туралларыгар баҕарбыттар.
Сардаана БАСНАЕВА, «Саха сирэ» хаһыат, edersaas.ru