Киһи «ийэ» диэҕи тыла тахсыбат кырыктаах дьахтарга суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, https://edersaas.ru/
Суут быһаарбытынан, бу 43 саастаах ийэ буолуохсут 2013 сыл балаҕан ыйыттан 2014 сыл ахсынньытыгар диэри кэм иһигэр 2011 сыл төрүөх уолчаанын санаатаҕын аайы кырбыы-муҥнуу сылдьыбыт. Онно туох барыта сылтах буолар эбит.
Онтон 2014 сыл ахсынньытыгар оҕо ийэтиниин хоһоон үөрэтэ олорбуттар. Оҕо оҕо курдук ол үөрэтэ олорон, онно-манна аралдьыйан ылар, мэниктиир-хайыыр буоллаҕа. Ийэтэ буойа сатаан баран, уола истибэтэҕин иһин, 68-тан итэҕэһэ суохтук маһынан кырбаабыт. Түөһүгэр улахан эчэйиилэри ылбыт оҕо эрэйдээх тыына хаайтаран, сонно быстаахтаабыт.
Оҕотун тыыныгар турбут ийэ буолуохсут ол кэнниттэн ыарахан депрессияҕа киирэн, 2016 сыл ыам ыйыгар диэри кэмҥэ балыыһаҕа эмтэммит. Экспертнэй хамыыһыйа быһаарбытынан, дьахтар буруйу эмоциональнай туруга тыҥаабыт кэмигэр, онно эбии итиригэ эбиллэн, оҥорбут. Быһымахтыйыы туругар (аффект) киирбэтэх.
Суут уурааҕынан, кырыктаах ийэ 15 сылга уопсай эрэсиимнээх холуонньаҕа көҥүлэ быһыллыбыт, онно эбии 1 сыл көҥүлэ хааччахтанар.
Ону таһынан, буруйун боруостуур сиригэр психиатрга көрдөрө-эмтэнэ сылдьыахтаах.
Вера МАКАРОВА, «Саха сирэ» хаһыат, https://edersaas.ru/
Хаартыска: интернет.