Дьокуускайга оҕо саадын иитиллээччилэрэ СӨ норуодунай бэйиэтэ, тылбаасчыт, оҕо суруйааччыта Иван Мигалкин хоһооннорун ааҕыыга күрэхтэстилэр. Күөн күрэс түһүлгэтэ Надежда Андреева сэбиэдиссэйдээх «Ромашка» уһуйааҥҥа ыытыллыбытын туһунан методист Марфа Могдоева иһитиннэрдэ.
— Түһүлгэҕэ Октябрьскай уокуруктан: 21-с, 39-с, 43-с, 89-с, 104-с, 105-с №-дээх оҕо саадтарыттан уонна “Семицветик”, “Мэри Поппинс” уһуйаантан түмүстүлэр. Саха сирин суруйааччыларын түмсүүтүн бэрэссэдээтэлэ, СӨ норуодунай бэйиэтэ Иван Мигалкин үөрүүлээх тэрээһиммитигэр ыалдьыттаата, кырачааннар ааҕыыларын сыаналаата. Кинини сэргэ дьүүллүүр сүбэҕэ “Туллукчаан” оҕо саадын логопеда Людмила Ширяева, “Мир приключений” бибилэтиэкэ кылаабынай бибилэтиэкэрэ Оксана Боярова үлэлээтилэр.
Долгутуулаах тэрээһин «Ромашка» оҕо саадын муусукаҕа педагога Роза Спиридонова Иван Мигалкин “Хаар” диэн хоһоонугар айбыт ырыатынан аһылынна. Ырыаны “Сандаара” ансаамбыл толордо. Онон куонкурус биир халыыбынан барбакка, ырыа-тойук аргыстаммыта сэргэх буолан биэрдэ. Салгыы кырачаан куонкурустаһааччылар көрөөччүлэр иннилэригэр тахсан хоһооннору доргуччу, ис сүрэхтэриттэн кыһаллан, киһи эрэ манньыйа, таптыы көрүөн, сэргээн, кэрэхсээн истиэн курдук үчүгэйдик аахтылар. Бука бары бэлэмнэнэн кэлбиттэрэ харахха тута быраҕыллар. Үөрэн мичилийбитинэн быычыкайкаан оҕолор бу тахсан кэллэхтэринэ, чобуотук туттан-хаптан, саҥаран-иҥэрэн бардахтарына, үөрүүгүттэн ис сүрэххиттэн уратытык долгуйаҕын. Дьүүллүүр сүбэ айымньы ис хоһоонун уус ураннык дьүһүйэн тиэрдиини, туттан-хаптан көрдөрүүнэн ис хоһоонун арыйыыны, көстүүмнэрин, атрибуттарын, о.д.а. сыаналаата, — диир Марфа Петровна.
Долгутуулаах күрэстэһии түмүгүнэн, 5-6 саастаах оҕолорго 1 миэстэни Снежана Тотонова (21 №-дээх “Кэнчээри” оҕо саада), иккис миэстэни Гансар Васильев (105 №-дээх “Умка” оҕо саада), үһүс миэстэни Айаал Прокопьев ( 39 №-дээх “Ромашка” оҕо саада) ылбыттар.
6-7 саастаахтарга Варя Едисеева (“Кэнчээри” оҕо саада) бастаабыт, Сайаана Васильева (“Ромашка”) иккистээбит, Лияна Едисеева(“Ладушка”) үһүс буолбут.
Күрэскэ кыттыбыт оҕолорго бука барыларыгар ытыс тыаһыгар доҕуһуоллатан сертификаттар туттарыллыбыттар. «Семицветик» оҕо саадын иитиллээччитигэр Аня Даниловаҕа ааптар И.В.Мигалкин бэйэтин кинигэтин бэлэхтээбит.
Үөрүүлээх тэрээһин кыттыылаахтара маннык түһүлгэлэр оҕо дьоҕурун сайыннарарга олус наадалаахтарын бэлиэтээбиттэр. Эһиилги күрэскэ хайаан да кыттар баҕалаахтарын эппиттэр. Өйдүү-саныы сылдьарга хаартыскаҕа түспүттэр.
Биһиги корр., «Саха сирэ» хаһыат, edersaas.ru