Уопсастыба

ХИФУга тус сыаллаах үөрэхтээһиҥҥэ эһиил 750-тан тахса миэстэ көрүллүөҕэ

РФ Бырабыыталыстыбата 2021 сылга үрдүк үөрэх кыһаларыгар тус сыаллаах үөрэххэ ылыы квотатын бигэргэттэ. Ордук элбэх миэстэ, ол иһигэр Хотугулуу-Илиҥҥи федеральнай университекка эмиэ, мэдиссиинэ исписээлинэстэригэр көрүллэр.

edersaas.ru

2021 сылга ХИФУга тус сыаллаах үрдүк үөрэх бырагырааматынан – бакалавриакка, специалитекка, магистратураҕа, аспирантураҕа, ординатураҕа федеральнай хааһына суотугар үөрэххэ  ылыыга, барыллаан ааҕыынан, 750-та тахса миэстэ көрүлүннэ. Ордук элбэх миэстэ кэнэҕэһин медик буолар дьоҥҥо бэрилиннэ. Ол курдук, ХИФУ мэдиссиинэҕэ институтугар тус сыаллаах үөрэх квотата 262 миэстэҕэ тэҥнэспит. “Бүддьүөт уопсай миэстэтиттэн, “эмчит дьыалата” исписээлинэскэ көрүллүбүт тус сыаллаах миэстэ өлүүтэ 70 бырыһыаҥҥа, “педиатрияҕа” —  75, онтон “анестезиология-реаниматология” “патологическай анатомия, “рентгенология, “инфекционнай ыарыылар”, “пульмонология” курдук ординатура сэдэх хайысхаларыгар уонна атыттарга 100 бырыһыан”, – диэн Киин тутар хамыыһыйа начаалынньыга Елизавета Ильина эттэ.

Тус сыаллаах миэстэҕэ туттарсааччылар кэнэҕэһин үлэ биэриэхтээх тэрилтэлэриттэн туһаайар суруктаах (направление) туттарсаллар уонна босхо үөрэнэллэр. Үөрэҕин бүтэрбит киһи дипломун ыллаҕына, кинини үөрэххэ ыыппыт тэрилтэтигэр баран үс сылтан итэҕэһэ суох үлэлиэхтээх. Бырабыыталыстыба бэлиэтииринэн, үрдүк үөрэх кыһатын бары таһымыгар тус сыаллаах үөрэххэ ылыы квотата кэлиҥҥи сылга 9 бырыһыанынан эбиллибит.

Бу иннинэ РФ Бырабыыталыстыбатын бэрэссэдээтэлэ Михаил Мишустин кэллиэстэргэ уонна үрдүк үөрэх тэрилтэлэригэр тус сыаллаах үөрэтии туһунан саҥа балаһыанньаны бигэргэппитэ. Балаһыанньа тохсунньу 1 күнүттэн олоххо киириэхтээх уонна абитуриены тус сыаллаах үөрэххэ ыытар, онтон үлэҕэ ылыахтаах үөрэх тэрилтэлэригэр эппиэтинэһи сүктэрэр. Үлэҕэ ылбат түгэннэригэр, устудьуон тус сыаллаах миэстэнэн босхо үөрэммитин бүддьүөккэ толуйуохтаах.

Билигин ити нуорма үөрэх тэрилтэлэриттэн ураты, абитуриены үөрэххэ ыытар бары тэрилтэлэргэ дьайар. Саҥа дьыл кэнниттэн ирдэбил барыларыгар дьайар буолуоҕа. Ону тэҥэ, саҥа быраабыланан, эрэгийиэннэргэ көрүллэр тус сыаллаах үөрэх бүддьүөккэ миэстэтин субъект судаарыстыбаннай былааһын уорганын кытта сөбүлэһиллиэҕэ. Бу нуорма РФ Бэрэсидьиэнин сорудаҕынан ылылынна.

Ыспыраапка: 2020 сылга мэдиссиинэ исписээлинэстэригэр 302 миэстэ көрүллүбүтэ. 2020 сыллааҕы тутар хампаанньа түмүгэр 237 киһи үөрэххэ киирбитэ.

ХИФУ пресс-сулууспата.

1
0
Telegram @edersaas20

Добавить комментарий