Быйыл Хотугулуу-Илиҥҥи федеральнай универистет үрдүк уонна орто үөрэхтэригэр, уопсайа, 4154 бүддьүөт миэстэтэ көрүллүбүт. 2020 сылы кытта тэҥнээн көрдөххө, сүүстэн тахса миэстэнэн эбиллии баара бэлиэтэнэр.
Ил Түмэҥҥэ ыытыллыбыт “Саҥа оскуола” федеральнай бырайыак иитинэн “Кыһыл зона” миэдиктэрин оҕолоро: ЕГЭ-2021” диэн өрөспүүбүлүкэтээҕи бырайыак түмүгүн таһаарар мунньахха проректор Алексей Голиков: “Быйыл ХИФУга 4 тыһыынчаттан тахса бүддьүөт миэстэтэ көрүлүннэ. Сыллата бүддьүө миэстэтэ эбиллэн, талар идэлэр элбээн иһэллэр, саҥа бырагыраамалар киирэллэр. Быйыл Экэниэмикэ үрдүкү оскуолатын кытта толкуйдаан, экэнэмиис идэтигэр саҥа үөрэххэ ылыахпыт. Бу икки дипломнаах үөрэх (двойной диплом). Устудьуоннар биһиэхэ үөрэниэхтэрэ. Экэниэмикэ үрдүкү оскуолатын уонна ХИФУ преподавателлэрэ үөрэтиэхтэрэ. Ону таһынан, сыллата тус сыаллаах миэстэ эбиллэр. Быйыл ордук элбэх миэстэ Мэдиссиинэ институтугар көрүлүннэ”, — диэн бэлиэтээтэ.
ХИФУ уонна Экэниэмикэ үрдүкү оскуолата быйыл икки дипломнаах исписэлиистэри бэлэмниир “экэниэмикэ уонна даннайдары анаалыстааһын” (“экономика и анализ данных”) диэн саҥа үөрэҕи астылар. ХИФУга иһитиннэрбиттэринэн, бу идэҕэ үөрэммиттэр экэниэмикэни ырытан көрөр, көмпүүтэр наукатыгар уонна даннайдары анаалыстыыр сатабылларга үөрэниэхтэрэ. Бу бакалавр бырагыраамата буолар, 7 бүддьүөт миэстэтэ көрүллүбүт. Манна киирбит устудьуоннар, бастакытынан, “Экэниэмикэ үрдүкү оскуолата” национальнай чинчийэр университет биллэр-көстөр, ааттаах-суоллаах учуонай-преподавателлэригэр үөрэниэхтэрэ. Иккиһинэн, Саха сириттэн тахсыбакка эрэ икки үрдүк үөрэх дипломун ылар кыахтаахтар. Үсүһүнэн, аныгы олоххо ирдэнэр ырытан толкуйдуур сатабылларга үөрэниэхтэрэ.
Тустаах үөрэххэ туттарсарга биир кэлим эксээмэҥҥэ кыччаабыта математикаҕа (профильнай) 60 баалы, нуучча тылыгар 50 баалы, информатикаҕа 60 баалы ылар ирдэнэр.
Людмила ПОПОВА, “Саха сирэ” хаһыат, edersaas.ru
Хаартыска: https://ru.dreamstime.com