Суолталаах

ХИФУга бүддьүөт миэстэтигэр БКЭ түмүгүнэн докумуону тутан бүттүлэр

Хотугулуу-Илиҥҥи федеральнай университет бакалавриат уонна специалитет бырагыраамаларынан бүддьүөт миэстэтигэр докумуону тутууну түмүктээтэ. Киин тутар хамыыһыйа чахчытынан, 7109 абитуриентан 17985 сайабылыанньа киирбит.

edersaas.ru

Киин тутар хамыыһыйа исписэлииһэ Петр Кычкин: “Киин тутар хамыыһыйа от ыйын 25 күнүгэр киэһэ 18 чааһынан бакалавриат, специалитет бырагыраамаларынан бүддьүөт суотугар үөрэниэн баҕалаахтартан сайабылыанньаларын тутууну түмүктээтэ. ХИФУга ордук математика уонна информатика институтун, РФ Хотугулуу-Илиҥҥи тылларын уонна култуураларын институтун итиэннэ мэдиссиинэ институтун сэҥээрэллэр.

Ааспыт сылтан уратыбыт диэн – Судаарыстыбаннай өҥө порталын көмөтүнэн «Поступление в вуз онлайн» суперсервиһы туһаныы. Былырыын тус бэйэлэринэн кэлэн эбэтэр ХИФУ саайтынан тус кэбиниэт арынан ыытар кыахтаахтара”, — диэн эттэ.

Сүүмэрдиир хамыыһыйаҕа ХИФУ устудьуоннара эмиэ үлэлииллэр. Филологическай бакылтыат устудьуона Туйаара Корнилова иккис куурус кэнниттэн дьону кытта алтыһар сатабылын сайыннарар инниттэн саҥа эйгэҕэ холонон көрөргө быһаарыммыт. “Абитуриеннар үөрбүт харахтарын көрөр олус үчүгэй, кинилэр баҕа санааларын олоххо киллэрэллэригэр көмөлөһөбүт. Балаҕан ыйыттан абитуриеннарбытын филологическай бакылтыакка устудьуон быһыытынан үөрэ көрүөм. Үлэҕэ улахан уустук суох эрээри, элбэх абитуриент, төрөппүт кэлэн ааһарыттан киһи уйулҕа өттүнэн сылайар”, — диэн этэр.

Санатан эттэххэ, атырдьах ыйын 1 күнүттэн магистратураҕа туттарсар абитуриеннарга эбии тургутуулар саҕаланаллар. Докумуоннарын от ыйын 30 күнүгэр диэри туттарыахтарын сөп. Үөрэххэ киирии туһунан сиһилии иһитиннэриини ХИФУ саайтыттан билсиҥ.

 

ХИФУ пресс-сулууспата.

0
0
Telegram Whatsapp