Кулун тутар 29 күнүттэн ХИФУ устудьуоннарын бары куурустара «очнай» үөрэххэ тахсаллар. Онон билигин устудьуоннар уопсайга киирэн эрэллэр.
Билигин, биллэн турар, үгүс дьону коронавирус, вакцина боппуруоһа долгутар. Тыһыынчанан устудьуон үөрэхтэригэр тэҥҥэ тахсан, ыарыыга сыстыы хас да төгүл үрдүөн сөп. Онон сибээстээн «устудьуон үөрэҕигэр тахсарыгар вакцина ирдэниллэр дуо», «вакцинаны устудьуоннар төһө ылан эрэллэрий», «ылар санаалаахтар дуо» диэн боппуруостар үөскүүллэр. Бу ыйытыыларга эппиэт булаары бэйэм инстаграм страницабар ХИФУ устудьуоннарыттан кыра опрос оҥордум.
“Уопсайга киирдигит дуо?» диэн ыйытыыга 52 киһиттэн 19 эрэ киһи киирбитин биллэрдэ.“ХИФУ клиникатыттан вакцина ылар санаалааххыт дуо?» диэн ыйытыыга улахан аҥаара — 74% ылар санаабыт суох диэн хоруйдаатылар.
“Уопсайга киирэргитигэр вакцина ирдииллэр дуо?» диэн ыйытыыга 41 киһиттэн 9-һа ирдээбиттэрин биллэрдэ.
«ХИФУ клиникатыгар вакцина ылбытын дуо?» диэн ыйытыыга 6 киһи ылбытын, 43 киһи ыла илигин эттэ.
Университет таһаарбыт бирикээһигэр устудьуон вакцина эрэ ылбыт буоллаҕына үөрэҕигэр тахсар диэн буолбатах. Ол эрээри сорох оҕо биллэрбитинэн, кинилэртэн көрдөөбүттэр эбит.
Устудьуон бэйэтэ быһаарыныахтаах, коронавируһу утары быһыыны ыларын биитэр ылбатын. Ким вакцина ылар баҕалаах клиникаҕа тиийэн туруортарыан сөп. Быйыл уопсайга киирии уратыта диэн, медицинскэй көрүүнү таһынан ИФА анаалыһа ирдэнэр буолбут.
Милона Иванова, ХИФУ устудьуона
Хаартыска: ааптар уонна http://Ysia.ru