Алтынньы 25 күнүгэр сылын ахсын буолар Угловскай ааҕыылар XIV төгүлүн М.К. Аммосов аатынан Хотугулуу — Илиҥҥи федеральнай университекка ыытылыннылар.
Истээччилэр уонна лектордар Саха сиригэр чөл олох хамсааһынын лиидэрэ, Угловскай ааҕыылары тэрийбит профессор Карл Башарин сырдык аатыгар сүгүрүйдүлэр, кинини ахтан — санаан аастылар.
Тэрээһин модератора Матвей Лыткин этэринэн, бу ааҕыылар куһаҕан дьаллыктартан харыстыыр уонна сэрэтэр суолтаны сүгэллэр. Көрсүһүү ордук дьиэлэриттэн — уоттарыттан саҥа тэлэһийэн, оскуолаттан көччөх буолан көппүт бастакы куурус устудьуоннарыгар суолталаах диэн бэлиэтээтэ.
Хотугу норуоттар тылларын уонна култуураларын институтун профессора Зоя Башарина Угловскай ааҕыылар историятын сырдатта. Тэрээһин 2009 сыллаахтан үрдүк таһаарыылаахтык ыытыллар.
ХИФУ мэдиссиинискэй институтун IV куурсун устудьуона Артур Жирков профессор Карл Башарин туһунан ахтыы оҥордо. Ол курдук, эдэр киһи уһуйааччытын дойдутугар, үлэтигэр бэриниилээх, Саха сирин билимигэр чаҕылхай суолу хаалларбыт киһинэн сыаналыырын эттэ.