Бүгүн, ыам ыйын 24 күнүгэр, Славянскай сурук-бичик күнүн ХИФУ «Сэргэлээх уоттара» култуура киинигэр дьоһуннук бэлиэтээтилэр.
Ол курдук, ХИФУ филологическай факультета Леонид Юзефович «Зимняя дорога” арамаанынан “Осажденная крепость” диэн киинэ сүрэхтэннэ. Киинэни Амма улууһун Саһыл Сыһыы диэн сиригэр устубуттар. Бу сиргэ Саха сиригэр гражданскай сэриигэ Анатолий Пепеляев уонна Иван Строд этэрээттэрэ күөн көрсүһүүлэрин устудьуоннар итэҕэтиилээхтик оонньоон көрдөрдүлэр.
Киинэ улахан экраҥҥа көстүөн иннинэ бары тахсан киинэ хайдах уһуллубутун, оруоллары толоруу уустугун, төһө умсугутуулааҕын туһунан санааларын үллэһиннилэр. Ол курдук Анатолий Пепеляев оруолун толорбут Андрей Высоцкай, Иван Строд оруолун толорбут Михаил Соколов олус аһаҕастык кэпсээтилэр. Ол курдук Андрей Высоцкай хайдах аан бастакытын аты мииммитин, оруолугар киирбитин олус итэҕэтиилээхтик кэпсээбитин мин биһирээтим. Оттон Строд оруолун толорбут Михаил Соколов: «Мин филологическай факультет устудьуона буолбатахпын, ол эрээри бу оруолга оонньоон наһаа астынным. Онон атын факультет устудьуоннарыгар этиэм этэ, университеппыт иһинэн буолар бары култуурунай тэрээһиннэргэ көхтөөхтүк кыттан иһиҥ» , — диэн ыҥырыыта ытыс тыаһынан доҕуһуолланна.
ХИФУ стратегическай сайдыытын проректора Василий Михайлович Саввинов:
— Миэхэ Олег Гаврильевич Сидоров киинэ идиэйэтин эппитэ, Леонид Юзефовиһы ыҥырыахха сөбүн туһунан этии көтөхпүтэ. Мин Леонид Юзефович айымньыларын астынар, ытыктыыр киһи бу идиэйэни олус сөбүлүү истибитим. Леонид Юзефович биһиэхэ кэлбитэ уонна айымньы хайдах суруллубутун сырдаппыта. Ол историческай сирдэргэ сылдьан барытын көрөн-истэн киинэ устар туһунан күүстээх санаа киирбитэ. Билигин даҕаны Олег Гаврильевич идиэйэтэ элбэх, онон өссө да айар үлэ күүтэр дии саныыбын.
Тэрээһиҥҥэ СӨ култууратын уонна духуобунай сайдыытын миниистирэ Владислав Левочкин сырытта. Кини бу киинэни көрөн баран, ыччаты патриотическай иитиигэ сүрүн холобур буолар диэн бэлиэтээтэ:
— Саха АССР 100 сылынан Саха сиригэр элбэх документальнай киинэ уһулунна. Маннык өрөспүүбүлүкэбит сайдыытын, олоҕун-дьаһаҕын, устуоруйатын көрдөрөр киинэлэри оскуолаларга, нэһилиэнньэҕэ көхтөөхтүк көрдөрүөхпүтүн наада, — диэтэ.
Оттон мин тус бэйэм ХИФУ устудьуоннара устубут, бэйэлэрэ оонньоон көрдөрбүт киинэлэрин олус биһирээтим. Киинэни устуу сыанан аҕаабат үлэ. Үөрэҕи уонна уопсастыбаннай олоҕу дьүөрэлии тутуу — киһи олоххо көхтөөҕүн туоһута.
Ульяна ЗАХАРОВА.
Ааптар хаартыскаҕа түһэриилэрэ.
