ХИФУ устудьуоннара бэйдиэ сылдьар ыттар кыһалҕаларын быһаарыыга бырайыактара Росмолодежь гранын ылла.
ХИФУ устудьуоннара «Дай лапу» бырайыагынан кыайыылаах таҕыстылар. Быйыл сайын аһымал бэстибээлин тэрийэн, бэйдиэ сылдьар ыттарга саҥа хаһаайыттары көрдүүр былааннаахтар. Оттон билигин тэхиньиичэскэй боппуруоһу быһаарыы үлэтэ тыллар. Сөбүлэҥ түһэрсиитэ, тэрээһини ыытар сири булуу, бырагырааманы ырытан оҥоруу. Бу туһунан бырайыак ааптардарыттан биирдэстэрэ, ХИФУ ИЗФиР магистрана Татьяна Николаева сырдатар.
«Бу ХИФУ ИТФ бүтэрэр Владлена Находкиналыын оҥорбут бырайыакпыт. Бэстибээл иитинэн аһаҕас кэпсэтиини, сырдатар лиэксийэлэри, маастар-кылаастары уонна кэнсиэри былаанныбыт. Дьокуускайга бэйдиэ сылдьар ыттары харайар «4lapki» уонна «Wufteam» кытары бииргэ үлэлииргэ дуогабардастыбыт. Бэстибээл чопчу хаһыска ыытылларын билигин этэр кыахпыт суох, тоҕо диэтэххэ, өрөспүүбүлүкэҕэ эпидемиологическай быһыы-майгы хайдах буоларыттан тутулуктаах», — диэтэ.
Бырайыак ааптардара аһымал үлэни номнуо саҕалаабыттар. «Гаражнай атыыны» тэрийэннэр, онно киирбит харчыны бэйдиэ сылдьар ыттары тутар приюттарга, пууннарга биэрбиттэр. Маны сэргэ кыылга-сүөлгэ ас-үөл хомуйалларын, волонтердары кытары сибээһи туталларын, хайдах сатанарынан, кыалларынан бэйдиэ сылдьар кыыл-сүөл боппуруоһунан дьарыктанар кииннэргэ көмөлөһөллөрүн, биир ыкка саҥа хаһаайыны булбуттарыттан олус үөрэллэрин кэпсээтэ. «Бу бырайыакпытынан уопсастыба уонна куорат дьаһалтатын болҕомтолорун тардыахпытын, кыылы-сүөлү иитэр дьон эппиэтинэстэрэ үрдүөн баҕарабыт«, — диэн кини кэпсээнин түмүктээтэ.
+1
+1
+1
+1
+1
+1
+1