Москваҕа ыытыллыбыт устудьуоннар бойобуой ускуустубаҕа аһаҕас күрэхтэһиилэриттэн, Саха сирин спортсменнара кыһыл көмүс уонна боруонса мэтээллэрдээх кэллилэр.
Москваҕа педагогическай университет баазатыгар үс күн устатыгар кикбоксиҥҥа, айкидоҕа, мас тардыһыытыгар күрэхтэһии ыытыллыбыт. Барыта икки сүүскэ чугаһыыр спортсмен кыттыбыт. Ол гынан баран, биир сиргэ элбэх киһини түмпэт туһуттан, күрэхтэһээччилэр ахсааннара хааччахтаммыт. Сайаапканан Москва, Владимирскай, Смоленскай уобаластарыттан, Саха сириттэн кыттыыны ылбыттар.
Манна ХИФУ устудьуоннара Дмитрий Ноев уонна Эрэл Сивцев 70 киилэ ыйааһыннаахтарга мас тардыһыытыгар күрэхтэспиттэрин СИА иһитиннэрэр.
Кыайыылаах, ГРФ төрдүс кууруһун устудьуона Дмитрий Ноев кэпсээбитинэн, бу ыйааһыҥҥа тоҕус спортсмен күрэхтэспит. «Бары спортсменнар бэлэмнэрэ үчүгэй. Биһигини тириэньэрбит Егор Петрович сылы эргиччи эрчийбитэ. Харантыын кэмигэр дьиэҕэ олорон дьарыктанарга эрчиллии былаанын биэрбитэ. Түмүккэ, мин МГУ үөрэнэр Грузия уолун кытары күөн көрүстүм. Олус үчүгэй бэлэмнээх уол. Күрэхтэһиибит 2:0, мин кыайыыбынан түмүктэннэ», — диэтэ Дмитрий Ноев.
Салгыы ФТИ үһүс кууруһун устудьуона Эрэл Сивцев санаатын маннык үллэһиннэ: «Миэхэ бу күрэхтэһии улахан үөрүйэҕи биэрдэ. Онон кыттыбыппыттан олус үөрэбин. Ыйааһыммар 5 киилэни түһэриниим миэхэ уустук соҕус этэ. Күрэхтэһии үрдүк таһымнаахтык ааста».
+1
+1
+1
+1
+1
+1
+1