Хотугулуу-Илиҥҥи университекка үөрэнэр Ханьцин Чжао сүүс харахтаах дуобакка улуу Кытайга дьахталлар ортолоругар бастакы уонна билиҥҥитэ соҕотох аан дойдутааҕы гроссмейстерынан буолар.
Бу үрдүк аат киниэхэ муус устар ыйга Ташкеҥҥа (Узбекистан) ыытыллыбыт Азия чөмпүйэнээтин түмүгүнэн иҥэрилиннэ. Онно Ханьцин Чжао швейцарскай ньыманан барбыт сүрүн күрэхтэһиигэ 12 очукуону сурунан, уон алта күрэстэһээччитин кэннигэр хаалларбыта. Блицка эмиэ тэҥнээҕин булбатаҕа. Кини сүрүн күрэхтэһиигэ уонна блицка Азия чөмпүйэнээтин 2012 сыллааҕы үрүҥ көмүс призерунан, блицка уонна түргэн оонньууга 2015 сыллааҕы кыайыылааҕынан, кыргыттар ортолоругар аан дойду 2012 сыллааҕы чөмпүйүөнүнэн, 2013 сыллааҕы үрүҥ көмүс призерунан буолар.
ХИФУ физическай култуура уонна спорт институтугар үөрэнэр Кытай дуобатчыта дойдутугар сүүс харахтаах дуобакка бастакы уонна соҕотох аан дойдутааҕы гроссмейстер буоллаҕына, университет устудьуоннарыттан төрдүс киһинэн маннык үрдүк ааты ылары ситистэ. Кини иннинэ Николай Гермогенов, Степанида Кириллина уонна Айыына Собакина аан дойдутааҕы гроссмейстерынан буолбуттара.
Кытай дуобатчытын үөрүүтүн кини тириэньэрэ Николай Гермогенов толору үллэстэр. Билигин ХИФУ устудьуона Чжао алтынньыга-сэтинньигэ Таллиҥҥа (Эстония) ыытыллар дьахталлар ортолоругар сүүс харахтаах дуобакка аан дойду чөмпүйэнээтигэр бэлэмнэнэр.
Роман ПОПОВ, “Саха сирэ” хаһыат, edersaas.ru