Ааспыт күннэргэ «Профессиональное завтра» диэн Бүтүн Арассыыйатааҕы VI устудьуоннар бырайыактарын куонкурустарын финала Ставрополь куоракка буолан ааста. ХИФУ Хотугулуу — Илиҥҥи норуоттар тылларын уонна култуураларын институтун иккис кууруһун устудьуона Фаридум Алексеев «Полезное изобретение» диэн хайысхаҕа бастаата.
Устудьуон ыччаты үлэнэн хааччыйар «EY BOSS» диэн телеграм платформаҕа чат-бот оҥорбут. Манна икки блок киирбит: бастакы — вакансиялары көрдөөһүн, иккис — вакансиялары таһаарааһын. Бу чат — бот ыччакка, ону таһынан, доруобуйаларынан хааччахтаах дьоҥҥо үлэни булан биэриэҕэ диэн бэлиэтиир Фаридум.
Алтынньы 10-13 күннэригэр куонкуруска 829 киһи, ол иһигэр 364 доруобуйаларынан хааччахтаах устудьуон, кыттыыны ылбыт. Финалга 359 киһи 221 бырайыагын кытта тахсыбыт. Тэрийэр бөлөх 36 призеры уонна 21 бастыҥ бырайыагы таһаарбыт. Маны таһынан, экспиэрдэр хас биирдии хайысхаҕа анал бириистэри туттарбыттар уонна сэттэ ааптары, ол иһигэр алта бырайыагы, бэлиэтээбиттэр. Финал Хотугулуу — Кавказскай федеральнай университекка ыытыллыбыт.
Куонкурус тэрийээччитэ — инбэлииттэри уонна доруобуйаларынан хааччахтаах дьону үөрэтэр ресурснай үөрэх кииннэрин холбоһуга (РУМЦ). Тэрээһин Үөрэх уонна наука министиэристибэтин өйөбүлүнэн ыытыллыбыт.