“Хайдах быһыылаахтык?”, — диэн тута ыйытыы үөскүүр. Хотугулуу-Илиҥҥи федеральнай университет үөрэҕин салааларын деканаттарыгар бүддьүөт миэстэтигэр көһүөн баҕалаах устудьуоннартан сайаапка ылыыта саҕаланна, диэн иһитиннэрэллэр ХИФУ Үөрэх хаачыстыбатын хааччыйар департаменын исписэлиистэрэ. Биллэрин курдук, босхо үөрэхтээһиҥҥэ үчүгэйдик уонна туйгуннук үөрэнэр ыччаттар көһөр кыахтаахтар.
— Вакантнай миэстэ баар буоллаҕына, сессиятын туйгуннук уонна үчүгэйдик туттарбыт коммерческайга үөрэнэр устудьуон бүддьүөт миэстэтигэр көһөрүгэр кыах үөскүүр. Оттон биир миэстэҕэ хас да сайаапка киирдэҕинэ, устудьуон бэйэтин тус ситиһиилэрэ учуоттаналлар. Сайаапкалар анал хамыыһыйа мунньаҕар көрүллэллэр, — диэн быһааран биэрэр отдел начаалынньыга Варвара Матвеева.
Туйгун уонна үчүгэй үөрэхтээх устудьуоннары сэргэ тулаайах уонна төрөппүт көрүүтэ-истиитэ суох хаалбыт оҕолор, итиэннэ I курууппалаах инбэлиит-төрөппүттэрдээх устудьуоннар вакантнай миэстэҕэ ылыллыахтарын сөп.
Бүддьүөт миэстэтигэр көспүт устудьуон вуз академическай да, эбии да (айар, спортивнай, уопсастыбаннай уонна научнай үлэҕэ көхтөөҕүн иһин бэриллэр), итиэннэ именной уонна анал истипиэндьийэлэрин ылыан сөп.
ХИФУ пресс-киинэ иһитиннэрэринэн, деканаттар устудьуоннар сайаапкаларын олунньу 3 күнүгэр диэри ылаллар.