Хотугулуу-Илиҥҥи федеральнай университет Устудьуоннар күннэрин иитинэн медик-устудьуоннарга аналлаах хаартысканан быыстапканы тэрийэр. Хаартыскаҕа, хамсык дьаҥын утары туруулаһа сылдьар университет дьоруойдара тахсыахтара.
Мэдиссиинэ институтугар 1700-тэн тахса устудьуон үөрэнэр, 352 дипломнаах ординатор үөрэҕин салҕыыр. Институт кэлэктиибэ дьаҥтан туора турбата – күн бүгүн ыарыыны утары үлэҕэ 363 устудьуон уонна ординатор, 76 волонтер кыттыһар. “Кыһыл зонаҕа” 161 устудьуон уонна ординатор үлэлии сылдьар.
Дьаҥ тарҕаныаҕыттан устудьуоннар араас салааҕа күүс-көмө буолаллар. “Бары идэлэрин таһымын көрдөрдүлэр, үгүстэр “кыһыл зонаҕа” үлэлии бардылар, волонтер буоллулар. Ахсынньыга 1200 медик-устудьуон үлэлииллэрэ уонна быраактыҕа тахсыбыттара”, — диэн мэдиссиинэ институтун дириэктэрэ Николай Гоголев кэпсиир.
Быыстапкаҕа ХИФУ медиабэлиитикэҕэ уонна уопсастыбаннаһы кытта сибээскэ управлениетын фотографтара итиэннэ мэдиссиинэ институтун устудьуона Сардаана Петрова үлэлэрэ турдулар. Хаартыскалары үрдүк үөрэх биир кырдьаҕас кыһатыгар – анатомия куорпуһугар, институт инновацияҕа былаһааккатыгар – симуляционнай кииҥҥэ уонна “кыһыл зонаҕа” түһэрбиттэр.
Бастакы хаартыскалары Сардаана Петрова дьаҥ саҕаланыыта обсерваторга түһэрбит. Үлэ усулуобуйатынан сибээстээн, инфекционнай салааҕа хаартыскаҕа түһэрэр кыаллыбатын кэриэтэ диэн кини бэлиэтиир. “Өскөтүн кыаллыбата эбитэ буоллар, дьахталлар Саҥа дьыллааҕы салюту көрөөрү түннүккэ сүүрэн иһэр, кырдьаҕас оҕонньор ый буолан баран бастакы хардыытын оҥорор, эмээхсин кэмпиэтинэн балыыһаны аһатар эбэтэр кэлиэгэм анал харыстанар таҥас нөҥүө саатар кыратык да буоллар салгын киллэрээри түннүгү аһа турар каадырдара тахсыах этилэр. Манна сүрүннээн симиэнэм иннинэ уонна кэнниттэн ыарыһахтарга киирэргэ медиктэр туох-ханнык хонтуруолу ааһалларын түһэрбитим. Бу, аан дойдуга суолталаах уонна наадалаах диэн эрэнэбин”, — диэн ХИФУ мэдиссиинэҕэ институтун устудьуона кэпсиир.
Ону тэҥэ, Устудьуон күнүн чэрчитинэн ХИФУга үөрэххэ, билимҥэ, спорка, айар уонна уопсастыбаннай үлэҕэ ситиһиилээх устудьуоннары наҕараадалааһын, бырааһынньыктааҕы онлайн-кэнсиэр уонна “Университет бастыҥ выпускника” ааты иҥэрии тэрээһинэ буолуоҕа.
Ыспыраапка:
“Университет дьоруойдара” быыстапканы ХИФУ медиабэлиитикэҕэ уонна уопсастыбаннаһы кытта сибээскэ управлениета тэрийэр. Быыстапка тохсунньу 25 күнүгэр “Арассыыйа – мин устуоруйам” пааркаҕа аһыллыаҕа уонна олунньу 15 күнүгэр диэри туруоҕа.
ХИФУ пресс-сулууспата.
Хаартыска: Нина СЛЕПЦОВА (ХИФУ).