Маҥнайгы сааскы бырааһынньыгы, Дьахталлар аан дойдутааҕы күннэрин көрсө бэртээхэй сонуну иһиттибит. “Мир женщин” диэн ааттаах билиҥҥи кэм биллиилээх бэлиитиктэрин, учуонайдарын, суруйааччыларын, култуура уонна искусство диэйэтэллэрин туһунан дойду бастакы энциклопедиятыгар Хотугулуу-Илиҥҥи федеральнай университет алта учуонайа киирдэ.
Энциклопедияҕа Арассыыйа экэниэмикэтэ, култуурата, науката сайдарыгар улахан өҥөлөөх лидер дьахталлар биографиялара хомуллар. Кинилэр кимнээхтэрий? Филологическай бакылтыат бэрэпиэссэрэ Светлана Петрова, мэдисиинэ институтун бэрэпиэссэрэ Пальмира Петрова, естественнэй наукалар институтун бэрэпиэссэрдэрэ Людмила Пестрякова, Айталина Охлопкова, доцент, зарубежнай филология уонна регионоведения институтун дириэктэрэ Ольга Мельничук уонна доцент, Арҕааҥҥы экэнэмиическэй зонаҕа ректор сүбэһитэ Альбина Гольдман буолаллар.
Бары киэҥник биллэр лидэрдэр, мэдисиинэ, биология, педагогика, филология эйгэтигэр үрдүк таһымнаах исписэлиистэри бэлэмнээһиҥҥэ тус кылааттарын киллэрбит учуонайдар. Чинчийэр научнай үлэлэрэ эрэгийиэн социальнай-экэнэмиическэй сайдыытыгар, тулалыыр эйгэни харыстыырга, экологияҕа уонна киһи доруобуйатыгар, тылы уонна култуураны сайыннарыыга туһаайыллар.
Ыспыраапка:
“Мир женщин” энциклопедияны 2016 сылтан “Моя Москва” диэн кэмиэрчэскэйэ суох култуура пуондата таһаарар. Энциклопедияҕа Арассыыйа биллэр, улахан өҥөлөөх дьахталлара киирэллэр.
ХИФУ пресс-сулууспата, “Саха сирэ” хаһыат, edersaas.ru