ХИФУ учуонайдара аһылык мэйиигэ дьайыытын уонна фундаментальнай математика туһунан кэпсиэхтэрэ
Номнуо хаһыс даҕаны сылын бээтинсэ ахсын ХИФУ учуонайдара Дьокуускай куорат пааркатыгар бэрт интэриэһинэй, туһалаах “Open. лиэксийэлэри” («Open. лекции») ыыталлар.
edersaas.ru
Бу бээтинсэҕэ, атырдьах ыйын 9 күнүгэр, куорат олохтоохторугар, ыалдьыттарыгар анаан мэйии ыарыыларын уонна сөпкө аһааһын, ону тэҥэ, Саха сиригэр фундаментальнай математика сайдыытын туһунан кэпсиэхтэрэ.
Сорох аһылык мэйиигэ көмөлөөх, сорох буортулаах диэн аҕыйах сылтан бэттэх элбэхтик кэпсэтэр буоллулар. Атырдьах ыйын 9 күнүгэр киэһэ 18:00 чаастан медицина наукатын дуоктара, ХИФУ медицина институтун неврологияҕа уонна психиатрияҕа хаапыдыратын сэбиэдиссэйэ Татьяна Николаева аһылык уонна мэйии тиэмэтигэр аналлаах олус туһалаах лиэксийэтин кэлэн истиҥ. “Күн бүгүн араас чинчийиилэри ыыталлар, оттон сөпкө аһааһын боппуруоһунан букатын бүтүн институттар дьарыктаналлар. Аан дойдуга мэйии ыарыылара элбии туралларынан сибээстээн, “мэйиини аһатыы” боппуруоһа сытыытык турар”, — диэн лиэктэр бэлиэтиир.
Мэйиини сөпкө аһатар туһугар ханнык диетаны тутуһар ирдэнэрий? Биһиги курдук тымныы килиимэттээх эрэгийиэҥҥэ эттэн аккаастанан, аҥаардас үүннээйинэн, үрүҥ аһынан олоруохха сөп дуо? Ити уонна да атын ыйытыыларга профессор сөптөөх хоруйдары биэриэҕэ.
Эмиэ ити күн, киэһэ 19:00 чаастан, иккис лиэксийэ саҕаланар. Бу сырыыга физика-математика наукатын дуоктара, ХИФУ математикаҕа уонна информатикаҕа институтун математика анаалыһа хаапыдыратын сэбиэдиссэйэ Сергей Попов Арассыыйаҕа уонна Саха сиригэр фундаментальнай математика сайдыытын туһунан билиһиннэриэҕэ. “Быйылгы сылтан Арассыыйатааҕы наука академията эрэгийиэннэргэ тирэх оскуолалары арыйталаан эрэр. Кинилэр оскуола саастан кэнэҕэс учуонайдары бэлэмниир буолуохтара. Саха сиригэр тирэх оскуола оруолун Дьокуускай куораттааҕы уонна физика-тиэхиньиичэскэй лиссиэйдэр сүгүөхтэрэ. Лиэксийэҕэ фундаментальнай наука өйдөбүлүн уонна Саха сиригэр математикаҕа олимпиада сайдыытын историятын, бүгүҥҥү туругун туһунан кэпсиэм”, — диэн профессор иһитиннэрэр.
ХИФУ пресс-сулууспата