М.К.Аммосов аатынан Хотугулуу-Илиҥҥи федеральнай университет “Сырдат” диэн сахалыы аудио-кэпсэтиини (подкаст) сүрэхтээтэ.
«Үрдүк үөрэх кыһаларын билимҥэ ситиһиилэрин тарҕатыы – тоҕоостоох уонна интэриэһинэй хайысха. Ити олоҕурбут көрүҥнэринэн эрэ буолбакка, биһиги аудиторияны кытта саҥа ньымалар нөҥүө билсэргэ дьулуһабыт. Холобур, “Наш университет_лекции” бырайыагы куорат пааркатыгар бэйэтин истээччилэрин булбут “Опен лекция” салҕыыр. Ону дьон билимҥэ, саҥа билиигэ талаһара бигэргэтэр.
Ити хайысханы салҕаары өссө биир саҥа ньыманы олоххо киллэрдибит – “Сырдат” аудио-кэпсэтии (подкаст). Билигин аудио-кэпсэтиилэр араас эйгэни уонна тиэмэни хабаллар. Биһиги бэйэбит хайысхабытын буллубут. Ол курдук, сахалыы эйгэни сайыннарар инниттэн Саха сирин култууратын, тылын, литэрэтиирэтин туһунан кэпсиэхпит. ХИФУ РФ Хотугулуу-илиҥҥи тылларын уонна култуураларын институтун кытта сүбэбитин түмэн интэриэһинэй тиэмэлэри булуохпут» – диэн ХИФУ медиабэлиитикэҕэ уонна уопсастыбаннаһы кытта сибээскэ управлениетын начаалынньыга Ульяна Охлопкова иһитиннэрдэ.
Бастакы кэпсэтиигэ саха алгыһын, төрүт култууратын үөрэтэр учуонай, тыл билимин дуоктара, бэрэпиэссэр, Хотугулу-илиҥҥи норуоттар тылларын уонна култуураларын үөрэтэр институт культурологияҕа кафедратын сэбиэдиссэйэ Людмила Ефимова ыалдьыттаата. Биэриигэ алгыс туһунан сиһилии кэпсэттилэр. Тустаах тиэмэни ылбычча тобулбатахтар. Ол курдук, ыытааччы, устудьуон Игорь Данилов туох барыта алгыһынан саҕыллар, оннооҕор саха литэрэтиирэтэ алгыстан саҕаламмыта диэн бэлиэтиир.
Манна учуонай “алгыс диэн тугуй?”, “хас көрүҥнээҕий?”, “атын омуктарга баар дуо?”, “дьахтар алҕыыра көҥүллэнэр дуо?”, “алгысчыттан ирдэбил”, “алгыһы истэр дьонтон ирдэбил”, уо.д.а. сахалыы тыллаах дьону интэриэһиргэтэр ыйытыыларга хоруйдаата. Онон истээччилэр бастакы тиэмэттэн бэрт элбэҕи билбиттэригэр саарбахтааһын суох. Кэрэхсэбиллээҕэ диэн, бу аралдьытар аудио-кэпсэтии буолбатах. Чахчы дьон билиитин хаҥатар, сырдатар аналлаах.
“Сырдат” аудио-кэпсэтиини нэдиэлэҕэ биирдэ ХИФУ Инстаграмынан уонна ВКонтакте ситимнэринэн таһаарыахтара. Маҥнайгы сэһэргэһиини ыйыллыбыт сигэнэн https://www.instagram.com/tv/CHIJrb1qWb7/?igshid=r3z624esdicq киирэн истиҥ.
Людмила ПОПОВА, “Саха сирэ” хаһыат, edersaas.ru