ХИФУ спортсмена Красноярскай кыраайга көҥүл тустууга ситиһиилэннэ.
ХИФУ физкултуураҕа уонна успуорка институтун иккис кууруһун устудьуона Максим Толмачев 97 киилэ ыйааһыннаахтарга туһунна. Спортсмен Красноярскайга Д.Г.Миндиашвили аатынан тустуу Академиятыгар үөрэммит.
Институт физкултуураҕа-успуорка кулуубун салайааччыта Николай Николаев Максим Толмачев Красноярскай сүүмэрдэммит хамаандатыгар киирэрин уонна Арассыыйаҕа ыытыллар күрэхтэһиилэргэ икки эрэгийиэн аатыттан кыттарын иһитиннэрэр. «Максим Толмачев дьиссипилиинэни тутуһар кыһамньылаах устудьуон буолар. Кини билиигэ-көрүүгэ тардыһар, дьулуурдаах уонна успуорт бу көрүҥүнэн утумнаахтык дьарыктаныан, салгыы сайдыан баҕалаах. Кини билигин ыраахтан олорон үөрэнэр, сессиятын кэмигэр туттарар«, — диир Николай Николаев.
«Бу кыттыыбын «түөркэ» сыаналыыбын. Саҥа ыйааһыҥҥа тустан холонон көрдүм, хоттордум, ол гынан баран үчүгэйдик туста сатаатым. Эрчиллии мэлдьи ыытыллар эрэсииминэн барбыта. Билигин Сибиирдээҕи федеральнай уокурук улахан күрэхтэһиитигэр бэлэмнэнэбит. Онон атырдьах ыйыттан күүстээх эрчиллии салҕанар«, — диэн спортсмен санаатын үллэстэр.
Максим Толмачев пандемияттан сылтаан сыл аҥаарын устатыгар күрэхтэһиилэр ыытыллыбатахтарын, саалалар сабыылаах турбуттарын, онон бэйэтэ эрчиллибитин бэлиэтиир. Оттон билигин ыытыллар күрэхтэһиилэр көрөөччүтэ суохтар. «Көҥүл тустуунан аҕыс сыл дьарыктанным. Син эмиэ атын спорт көрүҥнэригэр курдук, тустууга саамай сүрүнэ — ылыстыҥ да бэриниилээх буолуу. Мин санаабар, бу күрэхтэһиигэ «үрүҥ көмүскэ» тиксэрбэр, эрчиллииттэн саҕалаан өйдүүн-санаалыын эргиччи бэлэмнээх буолуум уонна сөптөөх тактика көмөлөстүлэр«, — диэн этэр.
+1
+1
+1
+1
+1
+1
+1