ХИФУ үөрэх кыһатын сиригэр-уотугар табаҕы утарар үгэс буолбут рейдэлэр саҕаланнылар.
Бу тэрээһин ый устатыгар ыытыллар. Бүгүҥҥү күҥҥэ 34 киһи табахтаабыта тутуллубутун туһунан СИА университет пресс-сулууспата иһитиннэрбит.
ХИФУ ыччат бэлиитикэтигэр уонна үөрэҕи таһынан үлэҕэ проректоры солбуйааччы Саргылана Нестерева рейдэлэр сылга иккитэ — күһүн уонна саас ыытыллалларын бэлиэтээбит. Маннык чэбдигирдэр үлэни ыытар миэрэлэр устудьуоннар дьиссипилиинэлээх, доруобай буолалларыгар, куһаҕан үөрүйэхтэн аккаастаналларыгар анаан ыытыллар.
«Биһиги устудьуоннарбыт доруобуйаларыгар болҕомтолорун уураллар, чөл, чэгиэн олоҕу талаллар уонна успуорду сөбүлүүллэр, өйүүллэр. Хас биирдии устудьуон үөрэнэр кэмигэр инникитин ситиһиилээх буолууну талыахтаах», — диир солбуйааччы.
Рейдэ түмүгүттэн иһитиннэрбиттэринэн, балаҕан ыйын 17 күнүгэр 34 киһи ирдэбили кэспитэ быһаарыллыбыт, ол иһигэр 18 устудьуон. Өйдөтөр-сүбэлиир бэсиэдэлэр бу дьону кытары ыытыллыбыттар, куорпустарга уонна ХИФУ сиригэр-уотугар табахтааһын бобулларын туһунан өйдөтөр бэлиэлэр (памяткалар) түҥэтиллибиттэр.
«Ректор бирикээһинэн университет сиригэр-уотугар электроннай сигаретаны тардыы кытары бобуллар. Административнай боротокуол толоруллар түгэнигэр, устудьуону УСР-га учуокка туруораллар уонна бигэргэтиллибит бэрээдэгинэн кинини кытары үлэлэһэллэр», — диэн УСР тэрийэр-методическай уонна иитэр үлэҕэ отделын начаалынньыга Аида Сячикова сырдатта.
ХИФУ дружинатын байыаһа Дмитрий Иванов маннык рейдэлэр устудьуон куһаҕан үөрүйэхтэн аккаастанарыгар көмөлөһөллөр диэн этэр. «Мин бу дружинаҕа (ДНД) доҕотторум мэктиэлээһиннэринэн киирбитим.Рейдэлэргэ күнүскү эбиэт кэмигэр уонна киэһээ сылдьабыт. Онон уопсастыбаннай үлэ үөрэхпэр мэһэйдээбэт. Устудьуоннары чөл, чэгиэн олоҕу тутуһарга ыҥырабын».
+1
+1
+1
+1
+1
+1
+1