Тиэтэйиҥ. Кулун тутар 26-30 күннэригэр М.К.Аммосов аатынан Хотугулуу-Илиҥҥи федеральнай университекка оскуола үөрэнээччилэригэр, төрөппүттэргэ, учууталларга аналлаах аһаҕас аан күннэрэ буола тураллар. Ити туһунан ХИФУ саайтыгар суруллар.
Аһаҕас аан күннэрэ диэн тугуй? Тэрээһин чэрчитинэн үөрэнээччилэргэ университекка ылыы быраабылатын, хас бааллаах оҕолор киириэхтэрин сөбүн, ханнык идэлэр баалларын, устудьуон олоҕун, үөрэҕи таһынан дьарык, быһатын эттэххэ, университет туһунан туох баар иһитиннэриини, сүбэни барытын ылыахха сөп. Тэрээһин кыраапыгын университет анал саайтыгар киирэн көрүөххэ сөп.
Ону таһынан, ХИФУ үрдүк үөрэҕин иннинээҕи уонна профориентация факультета 9 уонна 11 кылаас үөрэнээччилэрин “Университет каникулларыгар” ыҥырар. Бырайыак чэрчитинэн ити икки эксээмэннээх кылаастарга анаан бары биридимиэттэргэ бэлэмнэнии кууруһун, профориентационнай диагностиканы, биирдиилээн консультациялары ыыталлар.
Биһиги корр., «Саха сирэ» хаһыат, edersaas.ru
Хаартыска: Айаал ЧЕРНОГРАДСКАЙ.