М.К.Аммосов аатынан Хотугулуу-илиҥҥи федеральнай университет орто үөрэхтэригэр быйыл бүддьүөт миэстэлэрэ хото көрүллүбүттэр. Оннооҕор — юрист, сиэстэрэ идэлэригэр. Сиһилии манна аах.
Үрдүк үөрэх тэрилтэлэригэр үөрэххэ туттарсыы үгэнэ. Ону сэргэ, орто үөрэххэ туттарсааччылар сорохторо номнуо сайабылыанньаларын ыытан олороллор. Быйыл ХИФУ юридическай кэллиэһигэр, мэдиссиинэҕэ институтугар, инфраструктурнай технология кэллиэһигэр (КИТ) барытыгар бүддьүөт миэстэлэрэ бааллара соһутта.
“Эдэр саас” саайт үлэһиттэрэ ХИФУ киин тутар хамыыһыйатын начаалынньыга Елизавета Ильинаттан туоһуластыбыт: “Юридическай кэллиэскэ 15 уонна мэдиссиинэ институтугар 25 бүддьүөт миэстэлэрэ быйыл саҥа баар буоллулар. Итини сэргэ, инфраструктурнай технология кэллиэһигэр (КИТ СВФУ) 2022-2023 үөрэх дьылыгар барыта 350 миэстэ көрүлүннэ. Инньэ гынан, ХИФУ орто үөрэҕэр, уопсайа, 390 бүддьүөт миэстэтэ баар”, — диэн этэр. Сиһилии ХИФУ саайтыгар ыйыллыбыт сигэнэн киирэн көр.
Аны күн бүгүн ХИФУ орто үөрэҕэр докумуону туттарыы хайдах эбитий? Киин тутар хамыыһыйа иһитиннэрэринэн, бүгүҥҥү, от ыйын 12 күнүнээҕи туругунан “право и организация социального обеспечения (күнүскү) идэҕэ 15 миэстэҕэ 210 сайабылыанньа, “информационные системы и программирование (разработчик веб и мультимедийных приложений” (күнүскү) идэҕэ 26 миэстэҕэ 170 сайабылыанньа, “сестринское дело” (күнүскү) идэҕэ 25 миэстэҕэ 109, “информационные системы и программирование (специалист по информационным системам)” идэҕэ 26 миэстэҕэ 120 сайабылыанньа киирбит. Саамай үрдүк куонкурустаах бырагыраамалар буолаллар диэн этэллэр.
Мэдиссиинэ институтуттан ураты ХИФУ орто үөрэхтэригэр сайабылыанньаны атырдьах ыйын 15 күнүгэр диэри ылаллар. Орто үөрэхтээх сиэстэрэ (мэдиссиинэ институтун иһинэн) идэтигэр туттарсааччылар профессиональнай тестированиены ааһар буолан, кинилэртэн докумуону тутуу атырдьах ыйын 10 күнүнэн түмүктэнэр.
ХИФУ иһинэн орто үөрэхтээх юристары бэлэмниир буолбуттара быданнаабыт эбит буоллаҕына, орто үөрэхтээх сиэстэрэлэри 2020 сылтан эрэ бэлэмнииллэр, итиэннэ төлөбүрдээх эрэ этэ.
Эһиилги былаан хайдах буолуон туоһуласпыппытыгар: “Мэдиссиинэ институтугар 20 миэстэ уонна инфраструктурнай технология кэллиэһигэр 325, уопсайа, 345 миэстэ былааннанар”, — диэн хоруйдаата.
Людмила ПОПОВА, “Саха сирэ” хаһыат, edersaas.ru
Хаартыска: СИАтан.