Хотугулуу-илиҥҥи федеральнай университет орто анал үөрэх кэнниттэн үрдүк үөрэххэ туттарсар абитуриеннартан докумуоннарын тутан бүттэ. Быйыл 4700 абитуриентан 12 тыһ. кэриҥэ сайабылыанньа киирдэ диэн ХИФУ киин тутар хамыыһыйата иһитиннэрэр.
“Быйыл киин тутар хамыыһыйа орто анал үөрэх (СПО) кэнниттэн туттарсар 4700-тэн тахса абитуриентан 12 тыһ. кэриҥэ сайабылыанньаны ылла. Докумуону от ыйын 10 күнүгэр диэри сирэй (лично) уонна «Поступление в ВУЗ онлайн» суперсервис нөҥүө туппуппут. Билигин орто үөрэх кэнниттэн туттарсааччылар үөрэххэ киирэр тургутуулары (вступительные испытания) ааһаллар. Кинилэр бэйэлэрэ туспа эксээмэннээхтэр, бу туттарсар хайысхаларыттан уонна исписээлинэстэриттэн тутулуктаах. Ону тэҥэ, орто үөрэх кэмигэр ылбыт тус ситиһиилэрэ учуоттанар. Бары үөрэххэ киирэр тургутуулар (вступительные испытания) от ыйын 25 күнүгэр түмүктэнэллэр”, — диэн ХИФУ киин тутар хамыыһыйатын салайар исписэлииһэ Петр Кычкин быһаарар.
Санатан эттэххэ, орто үөрэххэ эмиэ докумуоннары ылабыт, мэдиссиинэ хайысхатыттан ураты атырдьах ыйын 15 күнүгэр диэри сайабылыанньаларын биэриэхтэрин сөп. Мэдиссиинэ хайысхатыгар – атырдьах ыйын 10 күнүгэр диэри.
ХИФУ инфраструктурнай технологияҕа кэллиэһин тутар хамыыһыйатын эппиэттиир сэкирэтээрэ Виктория Бурнашева: “Бүгүҥҥү туругунан абитуруеннартан 850 сайабылыанньаны ыллыбыт. Былырыыҥҥыттан уратыта диэн, быйыл олоҕурбут (очно) уонна тэйиччиттэн (дистанционно) көрүҥүнэн тэҥҥэ тутан саҕалаатыбыт. Быйыл балачча бүддьүөт миэстэтэ көрүлүннэ, 350 миэстэ. КИТ икки сүрүн хайысхалаах: АйТи эйгэ уонна тиэхиньиическэй. Биир кэлим эксээмэнэ (ЕГЭ) да суох киириэххэ сөп, аттестат орто баалын көрөбүт”, — диэн этэр.