ХИФУ мэдиссиинэ наукатынан Арассыыйаҕа үс бастыҥнар кэккэлэригэр киирдэ

Ааптар: 
Бөлөххө киир:

RUR рейтинг агентствота мэдиссиинэ наукатынан, үрдүк үөрэх кыһаларын норуоттар икки ардыларынааҕы биридимиэтинэй рейтинин таһаарда. Манна араас дойдулартан, уопсайа, 505 университет киирбит, итинтэн 22-тэ Арассыыйа үрдүк үөрэҕин кыһата.

“Саха сирэ” хаһыат, edersaas.ru

Арассыыйаҕа үс бастыҥнар кэккэлэригэр Москватааҕы уонна Санкт-Петербурдааҕы судаарыстыбанай университеттар кэннилэриттэн, ХИФУ үс иһигэр киирбит.

Ол курдук, мэдиссиинэ наукатынан Арассыыйатааҕы үрдүк үөрэхтэр үс бастыҥ лидердэрэ:

  1. М.В.Ломоносов аатынан Москватааҕы судаарыстыбаннай университет – 183 миэстэ
  2. Санкт-Петербурдааҕы судаарыстыбаннай университет – 249 миэстэ
  3. М.К.Аммосов аатынан Хотугулуу-Илиҥҥи федеральнай университет – 278 миэстэ.

Тустаах көрдөрүү ХИФУ рейтинэ үрдээн иһэрин дьэҥкэтик туоһулуур. Ааспыт сыллааҕыны кытта тэҥнээн көрдөххө (мэдиссиинэ наукатынан), ХИФУ аан дойдуга 14, Арассыыйаҕа 3 кэрдииһинэн үөһэ тахсыбыт. ХИФУ стратегическай сайдыыга департаменын дириэктэрэ Татьяна Волкова: “Федеральнай университеттартан мэдиссиинэ наукатын рейтинигэр биэс үрдүк үөрэх киирбит – Хотугулуу-Илиҥҥи федеральнай университет, Уһук Илиҥҥи федеральнай университет, Хотугу (Арктикатааҕы) федеральнай университет, Казаньнааҕы федеральнай университет уонна Балтикатааҕы федеральнай университет. Сибиирдээҕи федеральнай университет, Ураллааҕы федеральнай университет, Соҕурууҥҥу федеральнай университет, Хотугулуу-Кавказтааҕы федеральнай университет уонна Крым федеральнай университета  хапсыбатахтар.

Маныаха ХИФУ эрэ кэлиҥҥи сылларга иннин диэки сыҕарыйар. Быраас буолуохтаах устудьуоннарбытын бэлэмнээһин хаачыстыбалааҕын норуоттар икки ардыларынааҕы экспиэртэр даҕаны бигэргэтэллэр”, — диэн эттэ.

Татьяна Волкова, ХИФУ кэнэҕэски исписэлиистэри бэлэмнээһин хаачыстыбатын үрдэтиигэ улахан үлэни ыытарын иһитиннэрэр. Бу үрдүк үөрэх кыһаларын аан дойдутааҕы рейтинигэр лидердэр кэккэлэригэр чиҥник турары, бөҕөргүүрүн туоһулуур: “Национальнай уонна норуоттар икки ардыларынааҕы рейтиҥҥэ ситиһии кэлэктиип былааннаах, быыччык үлэтин туоһулуур”, — диэн бэлиэтиир.

RUR рейтинг агентствота – Арассыыйатааҕы агентство буолар, 2010 сылтан баар. Round University Ranking университеттар рейтиннэрин систиэмэтин таһаарар итиэннэ кинилэри сыаналыыр эйгэҕэ консалтинговай өҥөнү оҥорор.

ХИФУ пресс-сулууспата.

+1
0
+1
0
+1
0
+1
0
+1
0
+1
0
+1
0