Маны аах Уопсастыба

ХИФУ мэдиссиинэҕэ туттуллар килиэйи айда

Мэдиссиинэҕэ туттуллар адгезив-килиэйи М.К. Аммосов аатынан Хотугулуу-Илиҥҥи федеральнай университет уонна В.А. Белай аатынан Беларусь өрөспүүбүлүкэтин национальнай академиятын металлополимернай мэхээньикэ ситиминэн дьарыктанар учуонайдара айдылар.

Килиэй көмөтүнэн киһи этигэр сыһыарар мэдиссиинэ өҥөлөрүгэр туһаныллар. Килиэй киһи тириитигэр мөкү дьайыыта суоҕунан уонна уһуннук туттуллуутунан атын килиэйдэри куоһарар.

Учуонайдар бэлиэтииллэринэн, мэдиссиинэҕэ туттуллар килиэйдэргэ үрдүк ирдэбил турар. Ол курдук киһи тириитигэр дьайыыта суоҕа, үчүгэйдик сыстара уонна эти кытта түргэнник силимнэһиитэ оруоллаах. Маннык килиэйи оҥорорго араас састааптаах матырыйаал туттуллар. Адгезив-килиэй каучуктан уонна онно майгынныыр полиизобутилен матырыйаалтан оҥоһуллар.

«Маны сэргэ биһиги куурдуллубут лишайник Hypogymnia physodes(L) биэрбиппит. Бу килиэйбит састаабыгар асептическай эрэ көрүҥү буолбакка, сытын эмиэ тупсарар. Киһини аллергиялаппат дьайыылаах. Ол курдук икки нэдиэлэ устата кинини туттуохха сөп», — диэн ХИФУ естественнай наука химическай салаатын доцена Наталья Местникова бэлиэтиир.

Бэлиэтээн суруйдахха, №23759 –дээх мэдиссиинэҕэ туттуллар адгезив-килиэйи оҥорон таһаарыыга ХИФУ уонна В.А.Белай аатын сүгэр наука национальнай академията кыттыгас патент ылбыттара. Килиэйи оҥоруу ааптардарынан естественнай наука институтун профессора Айталина Охлопкова, бу институт доценнара Татьяна Стручкова уонна Наталья Местникова буолаллар.

Ульяна ЗАХАРОВА.

0
0
Telegram Whatsapp