“Кэлэр үөрэх дьылыттан ХИФУ анал үөрэтэр-научнай киинэ — “Физика-техническэй” итиэннэ “Математика уонна IT” хайысхалаах икки саҥа кылааска оҕолору ылыаҕа. Лицейгэ киириэн баҕалаах оҕолору икки түһүмэҕинэн сүүмэрдиэхтэрэ. Кэтэхтэн түһүмэххэ оҕолор портфолиоларын көрүөхтэрэ. Иккис түһүмэххэ физикаҕа, математикаҕа уонна ИКТ тургутан көрүү буолуоҕа”, — диэн тустаах киин дириэктэрэ Милана Федотова иһитиннэрдэ.
Людмила Попова, “Саха сирэ” хаһыат, https://edersaas.ru/
Тохсунньу 12 күнүгэр тустаах киин уопсай орто үөрэх бырагырааматынан үөрэтэригэр Россия үөрэххэ надзора көҥүл биэрэрин туһунан быһаарыытын тутта. “Күһүҥҥүттэн ыла киин толору оскуола курдук үлэтин саҕалыаҕа. Онон лицей оҕолоро университет иһинэн үөрэх эбии дьарыгын таһынан уопсай бырагырааманан үөрэниэхтэрэ. Уопсай үөрэх булгуччулаах биридимиэттэрэ күн маҥнайгы аҥаарыгар, эбии дьарыктар эбиэттэн киэһэ ыытыллыахтара”, — диэн Милана Федотова эбэн кэпсээтэ.
Оттон 2017-2018 үөрэх дьылыгар хайдах ылыахтарай диэн боппуруос хас биирдии төрөппүтү, оҕону ордук интэриэһиргэтэр буолуохтаах. Ол курдук, физико-техническэй кылааска холонооччулар математика, физика тургутуутун ааһыахтара. Математика уонна IT кылааһыгар туттарсааччылар — математикаҕа уонна ИКТ-га.
Портфолиоҕа тугу ирдиир эбиттэрий?
Манна оҕолор араас таһымнаах олимпиадаларга кыттыбыттара көрүллэр. Милана Федотова:
“Өскөтүн оҕо улуус иһинээҕи олимпиадаҕа кыттан бастаабыт буоллаҕына, n-ахсааннаах баал эбиллэр. Оттон өрөспүүбүлүкэ таһымнаахха итинтэн арыый элбэх. Саамай улахан баал үөрэнээччилэр олимпиадаларын Россиятааҕы Сэбиэтэ (РСОШ) ыытар олимпиадаларыгар миэстэлэһиигэ ааҕыллыаҕа”.
Итини таһынан, хамыыһыйа оҕолор научнай-практическай кэмпириэнсийэлэргэ, араас ааҕыыларга, спортивнай уонна интеллектуальнай күрэхтэһиилэргэ кыттыыларын сыаналыаҕа. Үөрэх аттестатын уонна уопсай судаарыстыбаннай эксээмэн (ОГЭ) орто баала учуоттаныаҕа. Инньэ гынан, лицей аны күһүн үс кылааһы арыйыаҕа – 2 онус, 1 уон биирис.
Бэйэтэ лабораториялаах буолан, лицей материальнай-техническэй өттүгэр тэҥнээҕэ суох. Манна үрдүк таһымнаах, уопуттаах преподавателлэр үөрэтэллэр. Ити туһунан ХИФУ пресс-сулууспата иһитиннэрдэ.
Людмила Попова, “Саха сирэ” хаһыат, https://edersaas.ru/