Бэс ыйын 2 күнүттэн Хотугулуу-Илиҥҥи федеральнай университет клиникатыгар COVID-19 М и G кылаастарыгар хаан анаалыһын туталлар.
Клиника бүддьүөтү таһынан салаатын сэбиэдиссэйэ Надежда Попова кэпсээбитинэн, анаалыс түмүгэ үһүс-төрдүс күҥҥэ бэлэм буолар. “ИФА-тестированиены ким баҕарар ааһыан сөп. Сурутуу икки нэдиэлэ эрдэлээн ыытыллар. Тиксэрии логистиката оҥоһуллубута. Ону таһынан, түмүгү электроннай буостанан ыыттарыахтарын сөп”, — диэн сэбиэдиссэй этэр.
Надежда Попова тестар табыгастаахтарын бэлиэтиир. “Коронавирус анаалыһын тута М уонна G кылаастаах антителатыгар ылар буолан, үһүс-төрдүс тест оҥорор ирдэммэт. Анаалыс түмүгэр киһи коронавируска сыстыбытын уонна ыалдьа сылдьыбытын быһаарар кыахтаах”, — диэн быраас санаатын үллэстэр.
Анаалыһы ХИФУ клиникатыгар үлэ күнүгэр эрдэттэн сурутан туттарыахха сөп. Булгуччу ирдэнэр услуобуйа: COVID-19 ыалдьыбыт киһини кытта 14 күн устата хантаактаспатах уонна ОРВИ сибикитэ суох буолуохтаах. Анаалыһы аччык кэмҥэ туталлар, мааскалаах сылдьыы эрэсиимэ тутуһуллар, төлөбүрэ — контага суох оҥоһуллар (бесконтактнай). Билсэр нүөмэргит: +7(4112) 49-66-55.
ХИФУ пресс-сулууспата.