Бүгүн, атырдьах ыйын 31 күнүгэр, саҥа үөрэх дьыла саҕаланыытын көрсө ХИФУ инфраструктурнай технологияларга кэллиэһигэр «Информационнай-коммуникационнай технологиялар» хайысхаларынан саҥа мастарыскыай арылынна.
Санатар буоллахха, 2020 сыллаахха кэллиэс РФ Үөрэҕириигэ министиэристибэтэ «Эдэр профессионаллар» федеральнай бырайыак иитинэн биллэрбит күөн күрэһин кыайыылааҕынан буолбута. Үп уопсай суумата 39 536,7 тыһ.солк., итинтэн федеральнай грант 35 486,7 тыһ.солк., СӨ хос үбүлээһинин кээмэйэ 3 650 тыһ. солк., ХИФУ бүддьүөтүттэн 400 тыһ. солк.
Мастарыскыай саҥа аныгы тэриллэринэн хааччыллыбыт. Устудьуоннар сарсыҥҥыттан, о.э. балаҕан ыйын 1 күнүттэн, манна «Корпоративная защита от внутренних угроз информационной безопасности», «Веб-дизайн и разработка», «Сетевое и системное администрирование» уонна «Информационные кабельные сети» диэн түөрт компетенциянан дьарыктаммытынан барыахтара.
«ХИФУ аныгы хайысхаларга дьулурҕатык айанныыр итиэннэ биһиги университеппыт аан дойдуга куоталаһар, илин-кэлин түсмүһэр кыахтаах. Ситиһиилэр биһигини үөрдэллэр. Быйыл өрөспүүбүлүкэҕэ «Үөрэх» национальнай бырайыак чэрчитинэн араас хайысхаларынан барыта 28 мастарыскыай арыллыахтаах. 2024 сылга диэри федеральнай бүддьүөт суотугар өссө 200 мөл.солк. мастарыскыайдар тэриллиэхтэрэ«, — диэн СӨ Үөрэх уонна наука миниистирэ Михаил Сивцев бэлиэтээтэ.
«Ыытыллар күрэстэр уонна инфраструктура тэриллиитэ — бу барыта устудьуоннар ситиһиилээх уонна бэйэлэрин эйгэлэригэр куоталаһар кыахтаах исписэлиис буола үүнэн-сайдан тахсалларыгар туһуланар. Бүгүн бу саамай ирдэнэр идэлэринэн буолаллар. Маныаха үөрэҕи бүтэрээччилэрбит Сахабыт сиригэр хаалан үлэлииллэригэр баҕарабыт. Бэйэбит өттүбүтүттэн үөрэхтэрин бүтэрэллэригэр кинилэргэ бары кыахтар баар буолалларын туһугар кыһаллыахпыт«, — диэн СӨ Инновацияҕа, СӨ Инновацияҕа, цифровой сайдыыга уонна инфокоммуникационнай технологияларга миниистир Анатолий Семенов эттэ.
«Инфраструктурнай технологияларга кэллиэс сылтан сыл суолталааҕын көрдөрөр уонна бүддьүөт миэстэлэрин ылар. Ити туһугар топ-50 бастыҥ кэллиэстэр ахсааннарыгар киирэр ирдэнэр. Быйыл кэллиэскэ 295 миэстэ баар. Эһиил ити 340-тан тахсыа диэн эрэнэбит«, — диир ХИФУ ректора Анатолий Николаев.
«Мастарыскыайдар сүрүн сыаллара устудьуоннары такайыыны таһынан, дьарыга суох нэһилиэнньэни эмиэ үөрэтии. Маныаха биһиги өрөспүүбүлүкэ олохтоохторун идэҕэ бэлэмнээһин уонна оскуола үөрэнээччилэрэ эрдэттэн бэлэмнээх буолууларыгар бырайыактар кыттыылаахтарынан буолабыт. Аныгы технологияларга үөрэтэр алта маастарбыт үөрэммиттэрэ уонна квалификационнай эксээмэннэри туттарбыттара«, — диэн этэр ХИФУ инфраструктурнай технологияларга кэллиэһин дириэктэрэ Алексей Бессмертнай. Бу туһунан «Институт развития профессионального образования» ГАУ пресс-сулууспата иһитиннэрэр.
+1
+1
+1
+1
+1
+1
+1