ХИФУ кэллиэһигэр мастарыскыайдар тэриллиэхтэрэ

Ааптар: 
Бөлөххө киир:

ХИФУ кэллиэһигэр IT-компетенцияҕа мастарыскыайдар тэриллиэхтэрэ.

ХИФУ инфраструктурнай технологияларга кэллиэһэ РФ Үөрэххэ министиэристибэтин куонкуруһугар кыттан, «Информационнай-коммуникационнай технологияларга»диэн хайысхаҕа грант ылбыта. Онон «Үөрэх» национальнай бырайыак чэрчитинэн, түөрт мастарыскыайы тэрийэргэ 40 мөлүйүөн кэриҥэ солкуобай көрүллүбүтүн туһунан ХИФУ пресс-сулууспата иһитиннэрэр.
Профессиональнай үөрэхтээһини сайыннарыы институтун Москубатааҕы филиалын дириэктэрэ Максим Дмитриев кэллиэс WorldSkills араас таһымнаах национальнай чөмпүйэнээтигэр  көхтөөхтүк кыттарын бэлиэтиир. КИТ салалтата IT-идэлэргэ анал кииннэри  тэрийэргэ көдьүүстээх үлэни ыытарын этэр.
«ХИФУ КИТ ситиһиллибитинэн тохтообот. Кэллиэс «Үөрэх» национальнай бырайыагынан РФ Үөрэх министиэристибэтин уонна «Эдэр профессионаллар» федеральнай бырайыагынан куонкурус кыайыылааҕа буолла. Онон билиҥҥи кэмҥэ ирдэнэр IT-идэлэргэ түөрт мастарыскыайы тэрийэргэ грант ылла. Маныаха бу кыһа үчүгэй преподавателлэрдээх, улахан кыахтаах. Кэллиэс баазатыгар бырайыак дьоһуннук киллэриллэригэр эрэнэбин», — диэтэ кини.

Ылыллыбыт тэриллэргэ устудьуоннар түмүк аттестацияларын көрдөрөн туттарыахтара. «Дойду салалтата каадырдары бэлэмнээһин хаачыстыбатыгар болҕомтотун уурар. Онуоха каадырдары бэлэмнээһин дойду бары эрэгийиэннэригэр улахан суолталаах. Оттон IT-технология сайдыыта экэниэмикэ сайдыытыгар сүдү оруоллаах. Онуоха ХИФУ КИТ бу хайысхаҕа дьүккүөрдээхтик баран иһэр, — диир Максим Дмитриев.

Бырайыагы олоххо киллэриигэ үп-харчы көрүллүбүт. Суол каартата 2025 сылга диэри оҥоһуллубут. Аныгыскы сылга кэллиэс тэрили толору атыылаһыахтаах. Оттон мастарыскыайдары арыйыы 2021 сыл балаҕан ыйыгар былааннанар. «Демоэксээмэннэр (демонстрационнай) кэллиэскэ урут да ыытыллар буоланнар, анал былаһааккалар бааллар. Оттон билигин, куонкуруска кыайыы түмүгэр, саҥа тэриллэр ылылланнар, өссө элбэх устудьуон үлэлииригэр кыаҕы биэрэр. Манна эбэн эттэххэ, мастарыскыайдарга демоэксээмэннэри таһынан, өссө үөрэтэҕин. Саамай сүрүнэ — түөрт сүрүн компетенцияны сайыннарыыга. Биһиги мастарыскыайдарбыт эрэгийиэҥҥэ, дойдуга балаһыанньабытын бигэтитиэ диэн эрэнэбит», — диир ХИФУ КИТ информационнай тиһиктэри үлэлэтиигэ уонна  туһаныыга хаапыдыра сэбиэдиссэйэ Галина Протодьяконова.

ХИФУ КИТ дириэктэрэ Алексей Бессмертнай куонкуруска кыайар иһин сыралаах үлэ ыытыллыбытын этэр. «Бу «WorldSkills» национальнай чөмпүйэнээтигэр үлэһиттэр уонна устудьуоннар ситиһиилээх  кыттыыларын, мэтээллэри ылыыларын түмүгэ», — диэтэ кини. Дириэктэр эһиил мастарыскыайдар тэриллиилэрэ, кэллиэс устудьуоннарын үөрэтиигэ уонна идэҕэ таһымы үрдэтиигэ эмиэ биир бигэ тирэҕинэн буолуоҕар эрэнэрин биллэрдэ.

+1
0
+1
0
+1
0
+1
0
+1
0
+1
0
+1
0